Vukiçeviç: Pjesën e dytë nuk bëmë asgjë, marr përgjegjësi

Pas humbjes ndaj Tiranës me rezultatin 2-0 në stadiumin “Selman Stërmasi”, trajneri i Laçit, Dejan Vukiçeviç, ka folur pas ndeshjes në mikrofonat e “Supersport” duke analizuar sfidën ndaj bardhebluve. Sipas trajnerit të kurbinasve, gjërat morën një rrjedhë të çuditshme në pjesën e dytë. E PAKUPTIMTË - “E dinim që po luanim një ndeshje derbi, që po të gabonim, do ta kishim të vështirë. Lojtarët e mbrojtjes humbën disa topa që nuk kuptoheshin. Në pjesën e parë kam parë një luftë, të dyja ekipet që donin fitoren, por ishte thjesht një luftë, asgjë tjetër”.

PJESA E DYTË - “Nuk e kuptoj se si luajtëm në pjesën e dytë, sepse nuk bëmë asgjë. Në tri ndeshjet e para kemi reaguar kur kemi pësuar gol, si për shembull edhe ndeshja e kaluar, edhe ndaj Dinamos. E vërteta është se kemi nevojë më shumë për agresivitet. Duket sikur luajmë në një fushë me bar artificial, sepse për të luajtur me agresivitet, duhet ta bëjmë të gjithë bashkë dhe këtë nuk e kishim sot”.

MESFUSHA - “Golat kanë ndodhur kur ne e kishim topin në mesfushë. Ata na kapën në kundërsulm dhe na realizuan. Sigurisht pas golave është normale që lëmë më shumë hapësira. Askush nuk është i lumtur me dy pikë në katër ndeshje, e dinim që kishim një kalendar të vështirë dhe nuk kam ardhur që të fitoj kampionatin me katër ndeshje”.

GJENDJA – “Kur vjen trajneri i ri, me seanca stërvitore të reja, kërkesa të reja, gjërat ndryshojnë. Kam ardhur për të punuar dhe ajo që nxjerr është përgjegjësi si trajner. E di se sa të rëndësishme janë rezultatet”, përfundoi Dejan Vukiçeviç.