“I kërkoj ndjesë Adilit, situata që ndodhin edhe në Premier Ligë”
Trajneri i Skënderbeut, Migen Memelli, foli pas barazimit 0-0 që skuadra e tij regjistroi në shtëpi ndaj Vllaznisë. Në prononcimin për “Gol pas Goli”, tekniku pogradecar sqaroi edhe incidentin me mbrojtësin e skuadrës shkodrane Mevlan Adili, duke u shprehur: “Për të qenë më korrekt, po e kërkoj unë ndjesën i pari. Pjekuria vjen me kohën. Kërkoja të largoja Zguron sa më parë, sepse kam eksperiencë të hidhur me të. Hyra mes Zguros dhe Adilit për t’i qetësuar dhe për të shuar debatin. Mora një ofendim nga lojtari i Vllaznisë. I thashë: Mevlan futu brenda se atë e mbaj unë. Unë kam eksperiencë me atë djalin. Do të ruaj timin në fillim, pastaj atë të Vllaznisë. Harku i 90 minutave edhe në Premier Ligë i njeh këto debate, mos harroni Lampardin me stafin e Liverpulit. Për të qenë më korrekt, edhe me publikun edhe me ju në studio po e kërkoj unë ndjesën i pari. Pjekuria vjen me kohën. Kërkoja ta largoja Zguron sa më parë, sepse kam eksperiencë të hidhur me të”, deklaroi Memelli, duke shtuar më pas: “Janë nerva loje, ai është profesionist, ashtu sikurse edhe unë. U futëm në tunel, gjyqtari na ndëshkoi me karton të verdhë, për Adilin ishte i dyti. E thirra pas ndeshjes dhe ishte i mërzitur. Gjithsesi, jeta vazhdon dhe i uroj gjithë të mirat. Me Brdariçin fola për atë që ndodhi dhe e sqarova”. Ndërkohë, për sa i përket takimit, Memelli u shpreh kështu: “Vllaznia bëri një ndeshje më të mirë në pjesën e dytë. Raportet prishen pak në momentin kur kërkon të konkretizosh vertikalizimet. I kërkova të kishim shpejtësi në lojë dhe zhvendosje të topit nga një krah në tjetrin. Në pjesën e parë patëm rastet tona më të mira. Jam i mërzitur për lënien e 2 pikëve, jo për lojën, e cila ka qenë jashtëzakonisht e mirë, sidomos në pjesën e parë”, përfundoi trajneri i Skënderbeut.