Reja shpall listën, modifikime vetëm në mbrojtje

Rikthehet Balliu, Hysaj pritet që të kalojë majtas

Trajneri i Kombëtares shqiptare, Edoardo Reja, ka bërë publike listën me emrat e 25 lojtarëve që do të grumbullohen për dy ndeshjet e eliminatoreve të Botërorit "Katar 2022" ndaj Hungarisë dhe Polonisë. E para do të zhvillohet në "Puskas Arena", më 9 tetor, ndërsa me polakët ekipi përfaqësues do të përballet në "Air Albania", më 12 tetor. Lista kuqezi ka pak ndryshime në krahasim me grumbullimin e fundit, teksa risia është rikthimi i Ivan Balliut, i cili po kalon një formë të mirë me Rajo Valekanon në Spanjë. Ndërkaq, rikthehen Ermir Lenjani, Kastriot Dermaku dhe Federik Veseli, të cilët munguan në ndeshjet e shtatorit për shkak të dëmtimeve të pësuara. I pari po luan dhe po bën mirë në Zvicër me Grasshopersin, ndërsa Dermaku nuk është aktivizuar që nga muaji maj. Në listë rikthehet edhe mbrojtësi Veseli i cili ka lënë pas dëmtimin, por në fushë nuk ka zbritur akoma dhe ndeshja e fundit që ka luajtur është në muajin qershor në miqësoren ndaj Çekisë.

MUNGESAT - Të gatshëm për Kombëtaren nuk do të jenë mesfushorët Qazim Laçi dhe Armir Abrashi, të dy për arsye dëmtimi. Abrashi pas një rikuperimi të shpejtë ka pësuar sërish një dëmtim në të njëjtin vend, ndërsa Laçi nuk ka qenë i gatshëm në ndeshjen e së shtunës për klubin e tij, Azhaksio në Francë. Të dy nuk do të kenë mundësi të japin kontributet e tyre për kuqezinjtë. Edhe pse me dy mesfushorë të dëmtuar, rikthimi i Taulant Xhakës nuk ka ndodhur. Kjo tregon se mesfushori i Bazelit i ka larë duart me Kombëtaren shqiptare pasi edhe me një mesfushë të zbuluar Xhaka nuk është grumbulluar. Ndërsa rikthimi i Ivan Balliut në krahun e djathtë të mbrojtjes ka lënë jashtë liste Albi Dokën. 24vjeçari që luan te Gorica në Kroaci ishte titullar në fitoren 1-0 ndaj Hungarisë. Një zgjedhje taktike e trajnerit Reja që me shumë mundësi do të aktivizojë Balliun djathtas dhe Hysajn në të majtë.

LISTA - Pjesa tjetër e listës nuk ka ndryshime, gjithsej janë 3 portierë, te mbrojtja bie në sy numri i lartë i lojtarëve, plot 11. Në repartin e mesfushës kemi 7 futbollistë dhe 5 sulmues.

Pas impenjimeve me klubet në fundjavë lojtarët do të grumbullohen të hënën në Durrës për të nisur përgatitjet për dy ndeshjet e radhës, që janë vendimtare për Kombëtaren në eliminatoret e Botërorit. Shqipëria renditet aktualisht e dyta në Grupin

I me 12 pikë pas 6 ndeshjesh. Ditën e sotme ekipi përfaqësues do të nisë përgatitjet dhe në orën 13:15 trajneri i Kombëtares, Edoardo Reja, do të dalë në konferencë për shtyp, ku do të shpjegojë edhe zgjedhjet dhe do të analizojë dy sfidat e radhës.