Markez bën “sherifin” në Teksas, fitore prej kampioni në Austin
Mark Markez rikthehet të mahnisë, duke fituar garën e dytë sezonale në Moto GP, pas një paraqitjeje dominuese në Çmimin e Madh të Amerikës. Spanjolli i Hondës u tregua i jashtëzakonshëm në Austin, që prej hapjes së semaforëve e deri në finish. I nisur nga vendi i tretë, ai tregoi muskujt që në kthesën e parë, duke marrë kreun, për të mos e lëshuar më deri në fund të garës në cirkuitin teksan. Ndërsa podiumi u kompletua nga dy pretendentët për titull, Fabio Kuartararo dhe Françesko Banjaia, të cilët u renditën respektivisht në vend të dytë dhe të tretë. Ky pozicion sigurisht që kënaq më tepër francezin e Yamahas, që e rrit edhe më tepër diferencën me italianin. “El Diablo” tashmë kryeson me 52 pikë më tepër se piloti i Dukatit, teksa ky i fundit nuk arriti ta shfrytëzonte siç duhet nisjen nga “pole position”. Vendi i katërt në garën e djeshme shkoi për Aleks Rins, ndërsa Horge Martin, i cili mori edhe një ndëshkimin
me “long lap” në xhiron e fundit, u klasifikua i pesti. Duke u kthyer te protagonisti absolut, Markez mori suksesin e tij të shtatë në tetë paraqitjet që ka bërë në tokën amerikane, duke konfirmuar superfuqinë e tij në Austin. Kjo ishte fitorja e dytë në këtë Botëror për spanjollin, pas triumfit në
Gjermani. Tetë herë kampioni i botës duket se po rikuperon plotësisht nga dëmtimi, ndërsa gara në Amerikë konfirmoi se është në gjendje të përballojë të gjitha xhirot me rendimet të lartë. Ndërkohë, një tjetër ditë për t’u harruar për italianët Andrea Doviciozo dhe Valentino Rosi, të cilët
u renditën respektivisht në vend të 13-të dhe të 15-të. Botërorit tashmë i kanë mbetur edhe tri gara, ku ndalesa e radhës është më 24 tetor në Itali, me Kuartararon që duket se po shkon i sigurt drejt titullit të parë kampion në karrierë.
MARKEZ: GJITHÇKA SIPAS
PLANIT - “Sherifi” i Austinit bën goditjen e radhës në cirkuitin amerikan, duke u konfirmuar si “zot” në këtë pistë. Mark Markez e komentoi kështu suksesin e shtatë në Amerikë, triumf që vjen pas një periudhe jo të lehtë për të: “Plani ishte ekzaktësisht ky, të bëja një start të mirë, për ta
menaxhuar më pas situatën. Isha në ditën time, me ritëm të shpejtë dhe gjithçka shkoi mirë. Isha i lodhur dhe sigurisht që nuk bëhet fjalë për një fitore të lehtë, por instinkti më tha që Kuartararo do të ngadalësonte, pasi kërkon të luftojë për titullin”, deklaroi pas garës piloti i Hondës.