Interi bën “tris” përmbysjesh, Handa për pak e dreqos
Kapiteni ndërhyn rrezikshëm, por falet nga arbitri
Një Inter shumë larg perfeksionit, por që di të vuajë dhe të marrë tri pikë shumë të vlefshme ndaj Sasuolos, që ia vështirësoi jo pak punën zikaltërve. Për të tretën herë në këto shtatë javë, ashtu si ndaj Veronës e Fiorentinës, zikaltrit e mbyllën pjesën e parë në disavantazh, por ditën të rikthehen me forcë dhe energji për të marrë fitoren. Një fraksion i parë i shëmtuar i kampionëve, të cilët nuk dolën dot në asnjë moment në lojën e tyre, por me zëvendësimet e pjesës së dytë fituan një marsh më shumë duke e kaluar presionin në krahun tjetër. Inzagi ia besoi sulmin dyshes Korrealautaro, kurse në krahë aktivizoi Perisiçin e Dumfrisin. Zikaltrit e nisën me manovrimet e munguara në Kiev duke u shfaqur të rrezikshëm me Çalhanoglunë e Barelan, por pas 15 minutash do të ishte Sasuolo ajo që do të merrte nën kontroll lojën dhe do t’i krijonte probleme Interit duke e detyruar mbrojtjen zikaltër të spastrojë shpesh zonën, derisa në të 22-ën Shkriniari rrëzon në tokë Bogan brenda zonës dhe arbitri Paireto akordon penallti. Berardi nuk gaboi duke kaluar vendësit në avantazh, rezultat me të cilin u mbyllën 45 minutat e para pas polemikave për ndërhyrjen e Handanoviçit ndaj Defrelit në çastet e fundit. Për pjesën e dytë në fushë zbritën të njëjtat formacione dhe miqtë u shfaqën përsëri konfuzë dhe me gabime të shumta në dalje. Atëherë Inzagi vendosi të hidhte në fushë Dimarkon, Darmianin, Vidalin e Xhekon, me këtë të fundit që do të gjente golin e barazimit menjëherë. Kur skuadrat ishin thuajse të përgjumura do të ishte përsëri Xheko që do të fitonte një 11metërsh, për të lejuar më pas Lautaron ta shndërronte në gol duke u sjellë miqve avantazhin. Boshnjaku do të shënonte përsëri, por u gjend në pozicion jashtë loje dhe ndeshja do të mbyllej 1-2, me Xhekon që i siguroi Interit dhe Inzagit qetësinë e nevojshme për të përgatitur ndeshjet e tjera.
MOVIOLA HANDANOVIÇ-DEFREL - De Vraj bën një gabim trashanik duke kthyer topin pas keq dhe Defrel vihet në ndjekje të sferës. Ky ishte momenti i daljes së Handanoviçit, që e prek kundërshtarin si me këmbën e majtë dhe me bërryl në fytyrë, jashtë zonës së rreptësisë.
Francezi rrëzohet, por arbitri Paireto nuk merr asnjë masë dhe as VAR-I nuk ndërhyn. Intensiteti i kontaktit i lihet fushës për t’u vlerësuar, por interpretimi i arbitrit është që Defrel i imponohet Handanoviçit dhe kërkon prekjen. Nga moviola qartazi ekziston një faull, ndërkohë që duket se mungon edhe një karton i kuq për portierin e Interit duke parë se porta ishte e boshatisur dhe ekzistonte një rast flagrant për gol. Ajo që shton edhe më shumë bindjen është vendimi i po të njëjtit arbitër që në një rast analog në ndeshjen Roma-fiorentina ndëshkoi me të kuq portierin Dragovski.