Prestige, tjetër goleadë në FSHF Sunday League Albania
11-0 ndaj Royals, vjen edhe fitorja e dytë sezonale
Prestige ka siguruar fitoren e dytë sezonale në po kaq takime në FSHF Sunday League Albania, teksa mbrëmjen e djeshme ka regjistruar goleadën e radhës në këtë kompeticion duke triumfuar me rezultatin e jashtëzakonshëm 11-0 ndaj skuadrës Royals. Një ndeshje pa shumë histori, e dominuar që nga minuta e parë e deri në fund nga Prestige, ku spikati Xhunga. Ky i fundit, ndonëse u aktivizua vetëm në pjesën e dytë arriti të realizojë plot 5 gola. Ndeshja- Shifrat u zhbllokuan në minutën e 7-të, me Allmetën
që shkarkoi një të djathtë nga distanca, duke e ndalur topin në trekëndësh. Vasha shënoi të dytin pas një asisti të Lleshit. Allmeta realizoi të dytin personal duke i thelluar shifrat në 3-0. Dopietë edhe për Vashën që finalizoi nga një distancë e afërt për golin e katërt. Më pas,
Lleshi shërbeu bukur për Kurpalin, teksa ky i fundit realizoi golin e pestë. Në pjesën e dytë Prestige bëri shumë ndryshime në formacion, ndërsa u aktivizua edhe kapiteni Fatmir Hysenbelliu. Prestige e ktheu ndeshjen më tepër në një takim stërvitor, teksa qarkullonte topin me shumë lehtësi në gjysmëfushën kundërshtare. Xhunga u tregua shumë i saktë në metrat e fundit dhe e gjeti rrugën e rrjetës 5 herë duke finalizuar me sukses aksionet e skuadrës. Emrin në listën e golashënuesve të takimit e regjistroi gjithashtu edhe Neziri. Kujtojmë që Prestige mban një rekord të jashtëzakonshëm në Sunday League, teksa po luan edicionin e tretë radhazi, ende pa pësuar asnjë humbje në kohën e rregullt në këtë kompeticion. Siç dihet, Prestige u shpall kampione në SLA1, ndërsa u ndal vetëm nga ruleta e penalltive në finalen e edicionit të kaluar. Prestige është kthyer në një pikë referimi për të gjitha skuadrat e futbollit amator në vendin tonë duke bërë që ky sport të zhvillohet dhe të masivizohet çdo vit e më shumë. Një skuadër e organizuar deri në detaje dhe e kompletuar me staf të plotë, në nivele madje më të larta edhe se shumë ekipe profesioniste.