Zhan Viktor: Skënderbeu, gati për fitoren e parë
Mesfushori brazilian: Kemi një ekip kompakt
Skënderbeu kërkon të marrë fitoren e parë dhe kjo për këtë skuadër në këtë moment është shumë e rëndësishme. "Ndoshta një presion i tillë na bën që të vuajmë humbjen e rasteve të krijuara para porte". Ky është mendimi i mesfushorit brazilian të korçarëve, Zhan Viktor. Në një prononcim të dhënë për "Panorama Sport", Viktor flet për ekipin këtë sezon dhe pritshmëritë në javët e ardhshme, ku sipas tij ndeshja me Kastriotin në transfertë është mjaft e rëndësishme për të hedhur një hap para dhe për t'i shpëtuar fundit të renditjes në këtë fillim sezoni.
Nga ana tjetër, braziliani bën me dije se tri pikë në katër javët e para nuk janë për t'u bërë dramë, pasi të gjithë ekipet kanë pasur pothuajse të njëjtën ecuri. "Këtë sezon e shohim se jemi shumë ndryshe nga një vit më parë, pavarësisht se rezultatet nuk kanë qenë ato
që të gjithë prisnim. Gjithsesi, kemi luajtur ndeshje të vështira dhe jemi paraqitur mirë. Ndoshta mungesa e fitores së parë sezonale na fut paksa në presion të rezultatit dhe shpërdorojmë shumë pasi në momente të caktuara nuk jemi të qetë. Mendoj se është diçka kalimtare dhe gjithçka do të kalojë me kalimin e javëve dhe fitimin e sigurisë. Këtë sezon jemi një grup cilësor që kemi luajtur bashkë më gjatë dhe mendoj se e njohim më mirë njëri-tjetrin. Kjo na jep siguri dhe vijimësi për të vazhduar me këto paraqitje. Mendoj se ndeshja e radhës është shumë e rëndësishme për ne dhe jam i bindur se kjo do të përkojë me fitoren e parë sezonale. E them këtë, pasi ndaj Kastriotit luajmë një ndeshje direkte dhe do të duhet të tregojmë se jemi më lart se pozicioni që kemi në renditje", ka thënë fillimisht Viktori. KAMPIONATI - Mesfushori mendon
se 3 pikë në katër takime nuk janë keq duke parë rivalët. "Nuk besoj se është problem një ecuri e tillë me tri barazime në ndeshjet e para të sezonit. Kemi tri pikë në katër javë dhe shumë e shohin si problem një gjë të tillë. Por duke parë që thuajse të njëjtën situatë dhe rrugëtim kanë edhe shumë ekipe në këtë sezon besoj se nuk është një problematikë vetëm e jona". MORAES - I pyetur për bashkëkombësin e tij, Agnaldo Moraes, ai nuk e fsheh optimizmin dhe vlerësimin për të. I ardhur së fundmi në ekip, Viktor beson se Moraes do të jetë një armë plus për Skënderbeun në këtë sezon. "Po, kam folur edhe disa ditë para se të vinte në Korçë. Më ka pyetur për klubin dhe ambientin. Jam i lumtur që ka ardhur, pasi është një lojtar cilësor. Ka bërë mirë një sezon më parë dhe e njeh kampionatin tonë. Besoj se do të na ndihmojë shumë", përfundoi Viktori. LLAZI SARO