Prestige “on fire”, 11 gola në debutim në kampionatin “5x5”
Prestige MFC e ka nisur me këmbë të mbarë kampionatin kombëtar të futbollit “5x5”, event që për vitin e dytë radhazi organizohet nën logon e FSHF-SË. Prestige bën pjesë në Grupin 6 për zonën e Tiranës, ndërsa mbrëmjen e djeshme në debutimin sezonal shpartalloi me rezultatin 11-1 skuadrën BFM MC, takim që u zhvillua në kompleksin “Football Republic”. Vetë rezultati është një tregues i qartë për dominimin absolut të Prestige. Edhe pse pa kapitenin Fatmir Hysenbelliu, skuadra u tregua në lartësinë e duhur duke e dominuar totalisht sfidën.
NDESHJA – Me gjithë superioritetin dhe rastet e shumta nga ana e Prestige, skuadra BFM MC befasoi, duke kaluar në avantazh në minutën e 17të. Por goli i pësuar e karikon më tepër Prestige, që menjëherë fillon ofensivën ndaj portës kundërshtare dhe vetëm 3 minuta më vonë vendos baraspeshën, me protagonist Lleshin, i cili realizon pas një kombinimi me Bibën. Ndërsa dy minuta më vonë, Allmeta përmbys në 2-1 duke goditur nga një pozicion i prirët. Edhe goli i tretë mban firmën e Allmetës, i cili gjuan fort nga një pozicion ballor, ndërsa në sekondat e fundit të pjesës së parë, Shima i dërgon shifrat në 4-1, teksa finalizon saktë në shtyllën e dytë një aksion të bukur. Pjesa e dytë nuk ka shumë histori, me Prestige që nuk “kursehet” dhe shënon edhe 7 herë të tjera. Fillimisht është Mërtiri që ekzekuton saktë një goditje standarde në afërsi të zonës. Më pas Allmeta mbyll me sukses një aksion të rrjedhshëm, duke kompletuar tripletën në aspektin personal. Antoni nuk fal nga një pozicion ballor për golin e tetë, ndërsa më pas shërben një asist për Lleshin, teksa ky i fundit shënon golin e nëntë. Në listën e golashënuesve të takimit i regjistrojnë emrat edhe Gjoni e Xhunga, ndërsa gjithçka mbyllet në shifrat 11-1 në favor të Prestige.