Brazili nuk ndalet, në Paraguai pushtojnë fushën për Mesin
Argjentina ndalet në “murin” e Paraguajit, mbetet e dyta
Brazili nuk di të ndalet në kualifikueset e Botërorit 2022. Në të gdhirë të së premtes Brazili ka mundur Venezuelën 3-1 duke arritur fitoren e nëntë në po kaq ndeshje. Fitore me përmbysje për ekipin e Tites, teksa Markinjos, Gabigol e Antoni fshijnë avantazhin e përkohshëm të vendësve. Argjentina nga ana e saj nuk shkon më shumë se një barazim pa gola në transfertën e Paraguait, teksa Mesi me shokë janë përplasur me murin e mbrojtjes vendëse. Barazim pa gola edhe në takimin mes Uruguait e Kolumbisë.
BRAZILI PA FRENA – Kualifikimi i Brazilit për në Botërorin e vitit të ardhshëm po ngjan gjithnjë e më shumë si një formalitet. Edhe me një skuadër të cunguar pa yllin Nejmar në fushë, Brazili nuk di të ndalet. Jeshilartët kanë mundur Venezuelën 3-1 në një ndeshje që nisi keq duke i dhënë shpresa vendësve për një fitore historike ndaj pesë herë kampionëve të botës. Erik Ramirez ka krijuar mjaft iluzione në kokën e lojtarëve të Venezuelës dhe të pranishmëve në stadium duke kaluar kombëtaren e tij përpara pas vetëm 11 minutash lojë. Brazili bën shumë pak në pjesën e parë, ku regjistrojnë vetëm një shtyllë. Në pjesën e dytë skuadra e Tites ndërron marsh dhe ëndrra e Venezuelës për një fitore nis të shuhet. Tiago Silva barazon për Brazilin, por goli anulohet. Por në minutën e 71të është Markinjos që barazon shifrat. Kaq mjafton që Brazili të marrë komandën dhe në fund Gabigol (85’) me 11-metërsh dhe Antoni (90’) realizojnë përmbysjen duke i dhënë suksesin e nëntë radhazi gjigantëve jugamerikanë.
MËSYHET FUSHA PËR MESIN – Ndërsa Brazili kalon në Karakas, Argjentina e Leo Mesit ndalet në Asunsion. Pa Lautaron në fushë por me treshen Mesi-di Maria-korrea, Argjentina nuk arrin të çajë murin e mbrojtjes të ngritur nga vendësit. “Albiçelestët” krijojnë mjaft raste me Angel Korrean, por pa mundur të shfrytëzojnë mundësitë e dhëna. Argjentina mbetet e dyta, 8 pikë pas Brazilit kryesues, kurse Paraguai është i treti me 16 pikë. Në takimet e tjera Ekuadori mundi Bolivinë 3-0, ndërsa Peruja mundi Kilin 2-0. Por lajmi ka qenë zbarkimi i tifozëve paraguaianë në fushë në fundin e takimit. Tifozët kanë zbritur nga shkallët për të bërë një foto me yllin e Argjentinës, Lionel Mesi. Policia ka ndërhyrë menjëherë, por në fakt nuk ka pasur asgjë për t’u shqetësuar, sepse zbarkimi në fushë i tifozëve vendës ka qenë paqësor... vetëm për një foto me “Pleshtin”.