Kastrioti, sot miqësore kundër Dritës së Gjilanit
Kastrioti do t’i japë fund sot minifazës përgatitore njëjavore me një ndeshje miqësore që do të zhvillojë ditën e sotme me ekipin e Dritës së Gjilanit. Kjo ndeshje do të zhvillohet në “Olimpik Park” në Durrës me nisje prej orës 15:30. Krutanët gjatë kësaj jave kanë zhvilluar përgatitje intensive që i kanë shërbyer stafit teknik për të ndrequr ndonjë mangësi të hasur në ndeshjet e fundit, por edhe për të kolauduar grupin, pasi një pjesë e lojtarëve i janë bashkuar me vonesë skuadrës dhe ende nuk janë qenë përshtatur mirë me grupin. Kjo pauzë për shkak të ndeshjeve të Kombëtares, krahas lojtarëve të ardhur me vonesë, i ka shërbyer shumë edhe futbollistëve që kanë qenë të dëmtuar, pasi Bedri Greca, Sokol Neziri, Edon Hasani dhe Ruben Silva, gjatë kësaj jave kanë zhvilluar stërvitje të plotë me grupin dhe shpresohet që deri në ndeshjen me Skënderbeun të kapin formën 100% dhe të jenë të gatshëm. I vetmi që vijon të jetë i dëmtuar është nigeriani Lukman Husein. Gjendja e mbrojtësit vijon të jetë ende shqetësuese dhe kjo mund të bëjë që 25-vjeçari të jetë në dyshim edhe për ndeshjen e javës së ardhshme të kampionatit ndaj Skënderbeut, pasi për ndeshjen e Kupës me shumë mundësi stafi teknik nuk do t’i rrezikojë lojtarët që nuk janë 100% gati, por do të luajë me një formacion miks. Gjithsesi, më e rëndësishmja për stafin teknik ka të bëjë me skuadrën, e cila pavarësisht së në dy ndeshjet e fundit ka marrë vetëm një pikë, loja ka pësuar rritje. Një ndër lojtarët që ka bërë mirë te krutanët në këto dy ndeshje dhe premton shumë për të ardhmen ka qenë edhe Spartak Ajazi, i cili është aktivizuar vetëm në 45 minuta në ndeshjen me Egnatian, ku krahas shënimit të golit, ka arritur të triumfojë në aspektin personal duke arritur të fitojë 20 duele personale.