Zoga: Një gabim në mbrojtje na kushtoi, vendi i 12-të rëndon

Reshjet e shiut nuk e kanë ndalur hovin e Apolonisë. Edhe pse në kushte të vështira atmosferike, ngarkesat kanë qenë të larta edhe dje. Java e ardhshme rezervon dy sfida të rëndësishme, ndaj edhe Juri Kanarsa po mundohet që ta çojë ekipin drejt perfeksionit. Krisild Zoga beson se kthesa nuk do të vonojë, ndërsa paralajmëron kualifikim në Kupë me Flamurtarin dhe fitore në kampionat kundër Tomorit. Gjatë një interviste të dhënë për “Panorama Sport”, ai komenton humbjen e fundit, atmosferën dhe pushimin. Sa e dhimbshme ishte ajo humbje në shtëpi përballë Tërbunit?

Shumë. Një humbje në shtëpi djeg gjithnjë dhe sidomos kur të zbret shumë poshtë në renditje. Megjithatë, nuk do demoralizohemi. Janë luajtur veçse 4 javë dhe kampionati është ende i gjatë. Mund të rikuperojmë pikët që kemi lënë dhe ngjitemi më lart në tabelë. Ne do t’i shkojmë deri në fund objektivit tonë. Çfarë nuk funksionoi në atë 90-minutësh?

Në momentin më të mirë tonin, u ndëshkuam. Kur po sulmonim vazhdimisht, një pakujdesi në mbrojtje na kushtoi shumë. Goli i pësuar vendosi takimin. Ne lamë sërish pikë në këtë ndeshje dhe tanimë vendi ynë në renditje është larg pritshmërive tona. Si është atmosfera në kampin fierak pas katër javëve të para të kampionatit?

Kemi një grup të mirë lojtarësh dhe nga java në javë po forcohemi. Harmonia në grup nuk mungon dhe pasi të gjejmë kthesën në rezultate, aty do ta shihni Apoloninë e vërtetë. Çfarë duhet të ndryshojë dhe përmirësojë kjo Apoloni?

Apolonia po i bën detyrat e saj në fushën e blertë, madje po i bën mjaft mirë. E vetmja gjë që duhet bërë është që të kurojmë edhe detajet më të vogla që bëjnë diferencën në takime të rëndësishme. Neve nuk na mungon dëshira dhe ambicia e madhe për ta fituar ndeshjen që në minutën e parë. Sa ju ndihmon ndalesa e kampionatit?

Besoj se do të ndikojë për mirë, pasi kemi punuar shumë këtë javë. Synimi ynë është i njëjtë si në fillim të kampionatit. Po punojmë shumë për të përmirësuar veten.