Partizani, Tirana dhe Vllaznia e nisin me fitore të pastra

Flamurtari, Lushnja dhe Barleti, KO në start

Superliga e volejbollit të femrave ka nisur dje sezonin 20212022 me tri takime të vlefshme për javën e parë. Asnjë surprizë në këto sfida, teksa skuadrat favorite siguruan të gjitha fitore të pastra. Kështu, Partizani, Tirana dhe Vllaznia e filluan mbarë duke koleksionuar 3 pikët e para sezonale. Kampionet në fuqi e dominuan totalisht ndeshjen e zhvilluar në sallën dytësore të “Asllan Rusit” ndaj një Flamurtari të përbërë me vajza të reja në moshë. Skuadra e Andi Lundrës shpërtheu që në setin e parë, të cilin e fitoi me rezultatin e jashtëzakonshëm 25-4. Në fraksionin e dytë kishte disi më tepër rivalitet, me kryeqytetaset që fituan 25-20. Edhe në setin e tretë diferencat ishin të mëdha, teksa Partizani fitoi 25-11 dhe vulosur suksesin 3-0. Fatbardha Picaku (16 pikë) ishte lojtarja më rezultative në lojën sulmuese të Partizanit, ndërsa shkëlqyen gjithashtu edhe Petëza (12 pikë) dhe Beshiri (11). Në radhët e vlonjateve të Theodhori Drizës, lojtarja më e mirë ishte Kejda Kodra. Në harkun kohor të 1 ore i mbylli gjithashtu llogaritë edhe Tirana e cila fitoi 3-0 në transfertë ndaj Lushnjës, takim që u zhvillua në Durrës, pasi salla e lushnjareve nuk i përmbush kushtet. Skuadra bardheblu e trajneres Amarilda Prenga ishte superiore në të tria setet, të cilat i fitoi respektivisht në shifrat 25-19, 25-17 dhe 25-21. Tirana ishte më e saktë në të gjitha komponentët e lojës, ndërsa Lushnja e kishte të pamundur që t’i përgjigjej nivelit të kundërshtarit. Leda Preçetaj me 19 pikë dhe Dhimitra Kole me 14, ishin lojtaret më të mira në fazën sulmuese të Tiranës. Asnjë problem edhe për Vllazninë, që likuidoi Barletin 3-0. Shkodranet e trajnerit Dorjan Tafa dominuan ndaj univeristareve të Artan Pogonit. Vllaznia e filloi me vrull, duke e fituar setin e parë thellë 25-14. Në dy setet e tjera kishte më tepër rivalitet, por ishin sërish vajzat kuqeblu ato që komanduan, duke fituar 2521 dhe 25-23. Për Vllazninë spikatën në këtë takim Liridona Kodra, Tuci, Kuçi dhe Zhivani. Ndërkohë, në radhët e Barletit, skuadër që vjen me largime të rëndësishme dhe me vajza të reja këtë edicion, lojtarja më e mirë ishte Luljeta Stërmilla. Me ndeshjen e sotme Skënderbeu-apolonia që do të luhet në orën 11:00 në Korçë, do të ulë siparin edhe java e parë e Superligës.

A.ALUSHI/S.NIKSHIQI