De Biazi: Gati të marr Kosovën
Italiani mund të gjejë në ekip lojtarë që i largoi kur ishte timonier i kuqezinjve
Xhani de Biazi mund të kthehet të flasë shqip, por këtë radhë me përfaqësuesen e Kosovës. Trajneri italian që shkroi historinë me kuqezinjtë duke u kualifikuar në Europianin “Francë 2016”, është i gatshëm të marrë drejtimin e “Dardanëve” pasi t’i përfundojë kontrata e tij me Azerbajxhanin, e cila mbyllet pas një muaji dhe me shumë siguri nuk do të rinovohet. Italiani që posedon edhe pasaportë shqiptare, pas zyrtarizimit të largimit të trajnerit Bernard Shaland, është lakuar si një nga kandidatët që mund të pasojë zviceranin në krye të përfaqësueses së Kosovës. 65vjeçari është kontaktuar dje nga disa media kosovare, ku ka pranuar se është i gatshëm të marrë drejtimin e Kosovës, nëse i ofrohet kjo mundësi, por njëkohësisht ka bërë të ditur se për momentin nuk ka pasur kontakte direkte me FFK-NË. “Mbas një muaji më skadon kontrata me Azerbajxhanin, por nuk kam folur me FFKNË. Jam i hapur dhe do të ishte kënaqësi ta merrja drejtimin e Kosovës”, tha fillimisht De Biazi për “indeksonline”, duke u ndalur më pas te shkarkimi i Shalandit. “Më vjen keq për Shalandin sepse e njoh, por kështu është puna e trajnerit”, vijoi tekniku i cili drejtoi Shqipërinë në suksesin më të madh të historisë së saj, pjesëmarrjen në “Euro 2016”. Për të njëjtën çështje Xhani de Biazi është pyetur edhe nga “gazetaexpress” dhe ai u ka dhënë këtë përgjigje: “Sapo kam arritur në Baku nga Beogradi. Deri tani nuk më ka kontaktuar askush. Unë kam kontratë me Azerbajxhanin deri më 30 nëntor dhe nuk është e ndershme të flas për kombëtaret tjera. Megjithatë, mund të them se Kosova e ka një ekip të mirë, të shkëlqyeshëm”. Nëse 65-vjeçari merr drejtimin e “Dardanëve”, i bie që të takohet me disa njohje të vjetra te Shqipëria, i cili gjatë drejtimit të kuqezinjve i nxori jashtë planeve të Kombëtares. Pikërisht bëhet fjalë për portierin Saimir Ujkani, kapitenin aktual të Kosovës, Amir Rrahmani, si dhe mesfushorët Herolind Shala dhe Milot Rashica.