FFK shkarkon trajnerin, Shaland: Ademi nuk bëri mirë
Tashmë është zyrtare. Trajneri Bernard Shaland nuk do të jetë më trajner i Kosovës. Një lajm të tillë e bëri të ditur vetë FFK-JA në një konferencë për shtyp të mbajtur mesditën e djeshme. 70vjeçari nga Zvicra ishte emëruar trajner i Kosovës në mars të vitit 2018 nga ish-presidenti i ndjerë i FFK-SË dhe legjenda e futbollit shqiptar, Fadil Vokrri. Shaland ishte trajneri i dytë në historinë e Kosovës, që prej pranimit të “Dardanëve” në UEFA dhe FIFA në vitin 2016. Humbja në shtëpi me Gjeorgjinë ka bërë që të mbushet “kupa”, gjë që solli edhe shkarkimin e Shalandit. Në daljen para mediave, bashkë me trajnerin zviceran, presidenti i FFK-SË, Agim Ademi, u shpreh se ishte zgjedhje e të dyja palëve pasi nuk u arritën objektivat e caktuar. “Ne duke pasur parasysh objektivat tanë dhe punën që e kemi bërë deri tash falënderojmë Shalandin sepse me të e kemi filluar, por që gradualisht nuk i kemi përmbushur obligimet apo objektivat tanë dhe në mënyrë të përbashkët kemi vendosur me i ndërpre bashkëpunimin. Nga sot (dje) Shaland nuk do të jetë pjesë jona. Duam ta falënderojmë trajnerin Shaland për punën e bërë me ekipin, për suksesin e arritur sidomos në Ligën e Kombeve. Duam të bëjmë me dije që kemi vendosur ta ndërprejmë bashkëpunimin me trajnerin, por që do të vazhdojmë bashkëpunimin edhe më tej në mënyra të ndryshme”, deklaroi Ademi. I pyetur se kush do të jetë pasuesi i Shalandit, presidenti i FFK-SË u shpreh: “Nuk kemi ende ndonjë përzgjedhje për trajnerin e ri, por që do të vazhdojmë për dy ndeshjet e radhës dhe më pas do të shikojmë se kush është opsioni”. BERNARD SHALAND
Në konferencën për shtyp të mbajtur me presidentin e federatës, Agim Ademi, trajneri Shaland u tregua i drejtpërdrejte duke i thënë Ademit se nuk bëri mirë që e shkarkoi. “Nuk jam i lumtur me vendimin e Agim Ademit për të më shkarkuar, por gjithashtu them faleminderit për mbështetjen dhe punën e federatës. Ishte për mua mundësi e mirë për të punuar me këtë federatë, që për mua ka bërë punë të mirë dhe duhet të them se nuk jam falënderues për sot, por për gjithë eksperiencën që kemi pasur deri sot. Shpresoj që një ditë të rikthehem këtu, të paktën për t’i shikuar ndeshjet e ekipit. Duhet të jeni më të durueshëm për ndërtimin e skuadrës, pasi kam besim se do të zhvillohet edhe më tej, pasi është një skuadër të re. Unë dua të them faleminderit edhe për federatën, tifozët që na kanë mbështetur vazhdimisht dhe na kanë dhënë motiv për të vazhduar me besimin për të bërë më tej dhe gjithmonë e kam ndier mbështetjen e tyre. Ka pasur shumë momente të mira te Kosova. Mënyra se si i kemi organizuar punët me federatën. Por, momenti më i mirë ishte edhe ndeshja ndaj Azerbajxhanit, me golat e Arber Zenelit. Në atë kohë isha trajner i mirë, pasi po fitonim, po shënonim gola dhe kishim suksese, por tani nuk jam i mirë. Kemi pasur po ashtu edhe ndeshje të tjera, si ajo me Anglinë, triumfi ndaj Çekisë, në përgjithësi kemi pasur momente të mira. Jam krenar për punën që kemi bërë së bashku, duhet të jeni krenarë po ashtu për ekipin që është ndërtuar”, u shpreh ishtrajneri i përfaqësueses së Kosovës. Zvicerani 70-vjeçar la të kuptohej se puna e tij te Kosova është e fundit për të si trajner.