Kastrioti bën detyrën, formalitet ndaj Elbasanit
Kastrioti arrin të triumfojë 20 edhe në ndeshjen e kthimit të turit të parë të Kupës së Shqipërisë kundër Elbasanit. Skuadra e Ramadan Ndreut dominoi gjithë takimin, por shpërdoroi shumë. Trajneri krutan kishte hedhur në fushë thuajse formacionin titullar, nga ku 4 prej tyre u zëvendësuan në fundin e pjesës së parë për t'i ruajtur për ndeshjen e fundjavës ndaj Skënderbeut për kampionatin. Që në minutat e parë janë krutanët ata që vënë në vështirësi kundërshtarin dhe në dy raste Basha dhe Ajazi i afrohen golit, por pa arritur të kalojnë portierin Miraka. Elbasani përgjigjet me kapitenin Bajrami, i cili nga një goditje dënimi i afrohet golit, por topi shkon ngjitur me shtyllën. Një pjesë e parë e kontrolluar më së shumti nga krutanët sjell shumë tentativa, por jo gol dhe mbyllet me rrjeta të paprekura. E dyta nis me zëvendësime dhe Ndreu aktivizon Grecën, Nezirin dhe të huajt Mudrazija e Onanunga. Loja e krutanëve pëson rritje, ku presingu ishte i lartë dhe rastet në portën e Elbasanit janë me shumicë. Në harkun e 25 minutave krijohen 7 raste shënimi me Ajazin, Grecën e Çelën. Goli do të vinte vetëm në minutën e 70-të. Një goditje dënimi harkohet bukur në zonë nga Çela dhe Ajazi i gjendur aty, nuk fal duke zhbllokuar sfidën. Elbasanasit nuk arrijnë të vënë në vështirësi Vatën. Nga ana tjetër, krutanët vijojnë të jenë të rrezikshëm me Ramin, Grecën, Mudrazijan, Ajazin, Çelën dhe Nezirin. Ky i fundit fiton edhe një penallti, të cilën e kthen në gol po vetë në minutën e 90-të. Me rezultatin 2-0 mbyllet i gjithë takimi i luajtur në Fushë-krujë. Në turin e dytë Kastrioti do të përballet me Flamurtarin e Vlorës, që këtë sezon militon në Kategorinë e Dytë.