Kukaj: Kujdes, mos u gënjeni nga klasifikimi
Kavajasit marrin masat për fushën. Jo pak herë ish-trajneri Ndriçim Kashami është ankuar dhe për këtë motiv gjatë gjithë kësaj jave punonjësit e stadiumit “Besa” janë shpërngulur në fushën e Luzit. Ata janë munduar që të rikuperojnë vendet ku terreni paraqiste probleme dhe ishte më i rënduar e mund të thuhet që gjithçka është gati për javën e 5-të të Kategorisë së Parë. Verdhezinjtë do të luajnë me Lushnjën dhe llogaritë bëhen vetëm me fitoren. Verdhezinjtë duan kthesën dhe sidomos pas asaj “trullosjeje” që pësuan në Burrel, ku morën 5 gola. Ndërprerja e kampionati i ka ardhur për shtat jo vetëm trajnerit të ri që të njohë më mirë grupin dhe implementojë idetë e tij, por edhe lojtarëve. Ata kaluan ngërçin psikologjik pas transfertës matjane dhe ndalesa u ka dhënë jo pak freski. Armenis Kukaj e cilëson delikate përballjen me lushnjarët dhe paralajmëron që të mos “gënjehen” nga klasifikimi. Në një deklaratë të dhënë për “Panorama Sport”, qendërmbrojtësi analizon edhe pushimin. “Gjykoj se kemi shfrytëzuar më së miri këtë kohë që patëm në dispozicion për shumë gjëra. Patëm nevojë për një shkundje e ajo erdhi në kohën e duhur. Tani mund të them se jemi plotësisht të gatshëm për takimin e radhës, në të cilin na kërkohet vetëm fitorja. Lushnja mbetet, sipas meje, kundërshtari më i vështirë i viteve të fundit, pasi na ka marrë shumë pikë. Situata e tyre në tabelën e klasifikimit nuk do të na ‘gënjejë’ pasi i njohim e vlerësojmë maksimalisht. Nuk na kërkohet të bëjmë heroizma, thjesht të bëjmë mirë atë që dimë të bëjmë. Loja jonë nuk ka çaluar asnjëherë, vetëm se kemi shpërdoruar e pësuar gola në fund, pikërisht atëherë kur nuk duhej. Nëse korrigjojmë këto, pa dyshim se jemi të aftë të mundim këdo”. FERIZ FERIZAJ