Magani kërkon përqendrim, Egnatia do pikë në Laç

Rrogozhinasit arkivuan kualifikimin në Kupë ndaj Turbinës dhe rikthyen menjëherë vëmendjen te sfida e sotme e kampionatit. Gjatë gjithë periudhës përgatitore pas ndërprerjes së kampionatit, trajneri Magani dhe stafi kanë bërë gjithçka që skuadra të ruante formën e mirë. Kalendari u rezervon një transfertë të vështirë ndaj Laçit, ku të dyja ekipet duan të marrin maksimumin. Përpara ndërprerjes së kampionatit Egnatia mori një fitore me vlera ndaj Kastriotit. Në ndeshjen e sotme me Laçin mungesë e konfirmuar për rrogozhinasit është ajo e Bruno Telushit, për shkak të kartonit të kuq që mori me krutanët. Në dyshim janë mbrojtësi Teqja dhe Artuar Magani, që janë në fazë riaftësimi pas dëmtimeve. Shqetësim ka pasur edhe mesfushori Agbekpornu, i cili do të qëndrojë pushim pasi ka pësuar dëmtim në këmbë. Por, ka edhe një rikthim të rëndësishëm, braziliani Xhekson është rikuperuar plotësisht. Te rrogozhinasit besojnë shumë që dyshja Imeri-pedro të udhëheqë me sukses sulmin, pse jo, të shënojnë nëse u jepet rasti. Që të dy lojtarët kanë qenë aktivë në javët e kaluara, si me asiste, por edhe me gola që i kanë dhënë pikë ekipit. Në seancën e fundit që u zhvillua dje në stadium u pa një përqendrim maksimal nga lojtarët. Trajneri Gugash Magani dha udhëzimet e fundit, ku gjatë seancës kërkonte saktësi në veprime. Seanca e fundit ishte gjithëpërfshirëse, ku u vendosën në zbatim të gjitha detajet, që nga organizimi i lojës, pasimet në zonë deri te goditjet në kuadrat. Ekipi i ka shmangur deklaratat për përballjen me Laçin, pasi duan të jenë të qetë dhe në fushë të bëjnë më të mirën. E vetmja përballje zyrtare mes dy klubeve është ajo e Kupës, një sezon më parë. Egnatia pas përfundimit të përgatitjeve u grumbullua dhe disa orë përpara do të marrë rrugëtimin drejt stadiumit të Laçit. Aktualisht, rrogozhinasit si debutues në elitë kanë siguruar pesë pikë me kundërshtarë të ndryshëm dhe regjistrojnë vetëm një humbje. Optimizmi mbetet i lartë, gjithsesi nga Laçi synojnë që të mos dalin pa pikë, që do t’i vlenin shumë vazhdimësisë në kampionat.