Heroi Xhixha: Gol si hajdut
“Fantastike, rrjeta më e rëndësishme në karrierën time si futbollist”
Redon Xhixha nuk mund ta kishte imagjinuar një fund më të mirë të derbit të kryeqytetit. Sulmuesi ka pranuar për “Supersport” dhe mediat pas duelit se ishte ende i emocionuar teksa komentonte golin “si hajdut” që kishte realizuar në minutën e 100-të.
E kishit menduar që do të shënonit gol dhe do të vendosnit fitoren në derbin me Partizanin?
Të them të drejtën, bindjen nuk e kisha që do të vendosja derbin se minutat po kalonin dhe po bëhej gjithçka më e vështirë. Por jam shumë i gëzuar që arrita të shënoja në fund dhe vendosa derbin dhe meqë e ka thënë edhe profesori që ka pasur bindje, i paska dalë fjala.
Po shënoni gola si te Laçi disa vite më parë ku për pak sa nuk dolët golashënues...
Te Laçi kam pasur sezon shumë të mirë me Nuabuezen dhe Tekon, shënova 12 gola. Këtë vit e kam nisur mirë me Seferin e Ngonë. Bashkëpunoj shumë mirë dhe shpresoj që të vazhdoj e të shënoj më shumë e ta kaloj atë sezon.
Duke e parë me gjakftohtësi, çfarë ndodhi në momentin e golit të dytë të Tiranës?
Mirë që u bë kështu se në fund të shijon më shumë. Profesori më tha: “E ke bërë golin si hajdut mes katër fanellave të kuqe”. Por ishte gol shumë i rëndësishëm, fituam dhe jam shumë i gëzuar për atë gol. Ka pasur edhe raste të tjera që kam humbur, por Gjumsi më dha supertop, kështu që shënova gol me superasistin e tij. 50% e golit ishte meritë e Gjumsit. Emocionet i kam akoma dhe nuk e di se çfarë po përjetoj as vetë.
Premio?
Kemi, por nuk na e tregojnë shifrën.
Ky është goli më i rëndësishëm me fanellën e Tiranës?
Të them të vërtetën, jo vetëm me Tiranën, por sa kam kohë që luaj futboll. Është goli që më ka shijuar më shumë dhe më i rëndësishëm.
Si e etiketoni këtë ndeshje në fund të 120 minutave lojë?
Kjo ishte një ndeshje karakteri. Pavarësisht se
pësuam gol, 10 minutat e fundit e treguam veten se jemi një ekip i fortë e me kualitet, shënuam në fund dhe arritëm të marrim fitoren.
Një ndeshje të tillë duhet të bëjë gjithmonë Tirana?
Ka ditë që skuadra është mirë, ka ditë që gjendja nuk është e mirë. Shpresoj që ditët e këqija të jenë vetëm një dhe të mos e zgjasim. Skuadrën e kemi të mirë. E mbyllëm dhe shpresoj që të vazhdojmë edhe në 2022-in.
Golin ama e latë për
minutën e 100-të, pas një rrjete të anuluar dhe dy rasteve të tjera...
Zoti ma shpërbleu. Pata raste dhe i humba. M’u anulua një gol, por më shpërbleu minutën e fundit të lojës me një gol që na solli edhe fitoren.