Largohet Ndreu, Kastrioti i beson stolin Emiljano Çelës
Ish-mbrojtësi emërohet në krye të pankinës
Ramazan Ndreu nuk është më trajner i Kastriotit, ndërsa në vend të tij emërohet Emiljano Çela. Pas tri sezoneve radhazi në krye të pankinës krutane, ku në dy prej tyre ka drejtuar ekipin në Superiore, 55-vjeçari krutan ka prishur dje kontratën me klubin. Rezultatet e fundit të skuadrës, por edhe dënimi që mori nga Komisioni i Disiplinës, duket se kanë ndikuar jo pak që palët të gjejnë një marrëveshje për ndërprerjen e bashkëpunimit. “Panorama Sport” publikoi dje lajmin përmes faqes zyrtare në internet, ndërsa vetë klubi bëri këtë sqarim në lidhje me trajnerin. “KS Kastrioti njofton
se ka mbyllur me konsensus bashkëpunimin me trajnerin Ramazan Ndreu. Pas një takimi të zhvilluar me presidentin, të dyja palët janë dakordësuar për ta mbyllur këtë bashkëpunim. KS Kastrioti e falënderon teknikun për kontributin e dhënë në skuadër dhe i uron shumë suksese”,
shkruhej në faqen e klubit krutan. Më pas konfirmohej edhe emërimi për herë të parë si trajner i 36-vjeçarit Emiljano Çela, i cili për plot 5 sezone radhazi mbajti veshur si mbrojtës fanellën e Kastriotit. “Klubi njofton se Emiljano Çela do të jetë trajneri i ri i Kastriotit. Ishmbrojtësi,
tashmë do të nisë një rrugëtim të ri si trajner në familjen ku kontribuoi për afro 5 vite me radhë si lojtar. Çelës i urojmë mirëseardhjen dhe shumë suksese në këtë rrugëtim të ri dhe të vështirë”, citohej në zyrtarizimin që i bëhej ish-futbollistit me origjinë nga
Memaliaj dhe që ka luajtur në shumë skuadra të elitës.
SITUATA – Për 36-vjeçarin është një eksperiencë e re, pasi vetëm pesë ditë më parë ishte në fushë si futbollist i Besës në Kategorinë e Parë. Duke qenë se raporti i tij me drejtuesit e klubit ka qenë shumë i afërt në vitet kur ka luajtur me Kastriotin, besimi është maksimal se Çela mund të bëjë mirë, duke qenë se e njeh ambientin krutan. Pritet që klubi të futet në merkato dhe të përforcojë repartin e mbrojtjes, aty ku skuadra ka vuajtur jo pak në 15 javë kampionat.