Dritan Mehmeti në “pole”, ja opsionet e Partizanit
Vëmendja te tregu vendës, tre emrat kryesorë në listë
Partizanit i duhet të gjejë një trajner të ri, pas ndarjes me Ilir Dajën. Të kuqtë kishin një nga trajnerët më të mirë në vend dhe tashmë do u duhet ta zëvendësojnë me një tjetër po aq cilësor, çka e bën mjaft të vështirë detyrën e tyre. Gjithsesi, opsionet në tavolinë janë disa dhe në kampin e kuq po mendohen ende. Trajneri i Partizani B, Dritan Mehmeti, po shikohet si një mundësi. Ai në të shkuarën ka punuar edhe si zëvendëstrajner i Franko Lerdës në ekipin e parë dhe e njeh shumë mirë ambientin e Partizanit. Kështu, drejtuesit po mendojnë të mos eksperimentojnë dhe të emërojnë Mehmetin në krye të ekipit, me mendimin për të parë ecurinë e tij dhe nëse shkon mirë, të vazhdojnë me të deri të paktën në fund të sezonit. Megjithatë, kreu i stolit të ekipit të dytë është vetëm një nga mundësitë. Partizani po shqyrton disa opsione, por duket se është i përqendruar më shumë për të gjetur një trajner nga tregu vendës, megjithëse nuk përjashtohet tërësisht firma me një strateg italian apo kroat. Skënder Gega, Gugash Magani dhe Shpëtim Duro janë tri opsionet kryesore për të marrë drejtimin e Partizanit. I pari ktheu titullin pas 26 vitesh dhe me qetësinë e korrektësinë e tij ka arritur të fitojë simpatinë e tifozëve, që duan më së shumti që ta marrë Gega drejtimin e Partizanit, por për momentin nuk ka pasur kontakte mes palëve. Magani, nga ana tjetër, nuk është një trajner i rangut më të lartë të mundshëm në vendin tonë, por në drejtimin e Egnatias tregoi se di të bëjë mirë dhe e shtyn klubin e kuq ta mendojnë si mundësi potenciale. Shpëtim Duro, është gjithashtu një emër mjaft interesant dhe i dashur në kampin e
kuq. Ai e ka drejtuar edhe në të shkuarën Partizanin dhe vjen pas dy eksperiencave pozitive me Kukësin dhe veçanërisht me Laçin. Eksperienca e madhe dhe aftësitë e Duros natyrshëm e bëjnë klubin e kuq ta mendojë edhe emrin e tij si trajnerin e ardhshëm të “demave”. Gjithsesi,
në kampin e kuq nuk e kanë marrë me nxitim, pasi edhe koha premton sepse përpara kemi pushimet dimërore. Aktualisht ekipin e drejton Renaldo Kalari, i cili do të udhëheqë stërvitjet e mbetura në këtë vit kalendarik. Më pas, drejtuesit do të piketojnë një nga
mundësitë e mësipërme duke marrë një vendim për të ardhmen e klubit të kuq, që aktualisht renditet në vendin e pestë në renditje, plot 15 pikë nga Tirana kryesuese. Me siguri në kampin e kuq përveç trajnerit, u duhet të diskutojnë edhe objektivat e këtij sezoni.