Tafili: Jemi gropë, urgjent afrime
“Presidenti duhet të zëvendësojë menjëherë largimet. Kemi nevojë për suportin e bashkisë”
Ndryshimi i objek tivave dhe sh kurtimi i shpenzimeve u shoqërua me largime nga Besa. Në total janë 6 titullarë që kanë shpallur “divorc”, disa me mirëkuptim, të tjerë prej rrogave apo prej përfundimit të kontratës. Kavajasit do të kenë tjetër pamje nga janari dhe zyrtarisht do të luftojnë për të qëndruar në 6 vendet e para, pasi e shohin të pamundur misionin “Superiore”. Megjithatë, ka edhe nga ata që do t’i qëndrojnë besnik ekipit dhe as që e mendojnë ikjen. I tillë është rasti i Alsid Tafilit, një prej të parëve që vendosi të rinovonte marrëveshjen
gjatë verës. Edhe pse është i shqetësuar për situatën, ai është i vendosur. Gjithsesi, një apel e ka për presidencën. Gjatë një deklarate të dhënë enkas për “Panorama Sport”, mesfushori kërkon prej Nexhat Bizhdilit që të nxitojë me merkaton dhe zëvendësojë vendet e mbetura bosh nga largimet. Dhe duhet thënë që rrjedhjet kanë prekur që të gjitha repartet, nga porta e deri në sulm. “Në çdo kampionat ka largime në këtë periudhë, madje edhe në Kategorinë Superiore. Për mua nuk është gjë e re. Është zgjedhja e secilit, ndaj duhet ta respektojmë. Ajo që më shqetëson, është kontigjenti i cunguar. Besa nuk është se ka kontingjent me 25 lojtarë dhe largimet mos i prishin punë. Përkundrazi, ne nuk kemi stol të fortë. Këtë e kemi thënë me kohë. Nëse shtojmë largimet e emrave si Canka, Çela, Hoxhaj, Bilali apo Birja, sigurisht që na krijohet një gropë të madhe. Ndaj, gjykoj se duhet urgjentisht të plotësohet ekipi. Luajmë një kampionat mjaft të fortë dhe do ta kemi mjaft të vështirë nëse vonohemi në prurjet e janarit”, u shpreh fillimisht mesfushori i verdhezinjve. APELI PËR BASHKINË Besës i kanë mbetur shumë pak titullarë. Veç Tafilit, kanë portierin Dobjani apo Perja, Kukaj, Hyseni, Muçaj, Hoxha e Meçja. Një “veteran” si shkodrani ka edhe një thirrje për Bashkinë e Kavajës.
“Në situatën ku ekipi ndodhet, personalisht kam vendosur që t’i qëndroj besnik Besës. Ndihem mirë këtu dhe jo vetëm në fushë, por mbi të gjitha jashtë fushe. Jam i respektuar kudo. E shoh të udhës që t’i bëj një apel Bashkisë së Kavajës, të na qëndrojë më afër e të na suportojë. Në këto momente kemi shumë nevojë për ta. Na duhet kjo mbështetje për të qenë dinjitozë për pjesën e mbetur të sezonit. Një emër si Besa patjetër duhet të vazhdojë të mbetet një ekip i lakmuar. Ndoshta objektivi ‘Superiore’ mund të mos arrihet, por e kemi detyrim të jemi dinjitozë dhe të fortë. Kështu i ka hije një klubi me traditë”, përfundoi 34-vjeçari.