Napolit i infektohet edhe Spaleti, panik përpara Juventus-napoli
Shtohen rastet, sot pritet vendimi final për supersfidën
Sa herë që në program është Juventus-napoli, të paktën në këto dy vite të fundit, duket se diçka duhet të bëhet shkak që ajo të jetë në rrezik zhvillimi. Të gjithë e kujtojnë sezonin e kaluar, kur takimi i javës së katërt (në program në muajin tetor) u shty për në pranverën e 2021-shit, por me sa duket edhe dueli i javës së parë të fazës së dytë të Serisë A rrezikon vërtet që të mos luhet. Nëse grumbullimet e të dyja skuadrave nisën me një numër jo të vogël infektimesh të konfirmuara (Kielini, Pinsoljo e Artur te Juvja dhe Osimhen, Lozano, Elmas e Malkuit te Napoli), dje në radhët e të kaltërve kanë dalë edhe dy raste. I pari është mbrojtësi i majtë, Mario Rui, ndërsa në mbrëmje ka rezultuar pozitiv edhe trajneri Luçiano Spaleti. “Në fund të xhiros së tamponëve të pasdites së djeshme, ka rezultuar pozitiv Luçiano Spaleti. Ndonëse trajneri është asimptomatik, ai është futur në izolim sipas protokollit”, lajmërimi zyrtar i klubit të Napolit. ASL-JA NË AKSION – Duke parë shtimet e tepërta të rasteve në të gjitha klubet, jo vetëm në radhët e të kaltërve, ASL-JA (Shoqata Sanitare Lokale) e krahinës së Kampanjës, po analizon dhe do të vlerësojë me kujdes situatën në klubin napolitan dhe ndoshta vetëm sot, pas një xhiroje të radhës tamponësh, do të marrë një vendim zyrtar, nëse do të lejojë nisjen me avion të ekipit drejt Torinos apo jo, për ndeshjen e mbrëmjes së nesërme, në orën 20:45.
LIGA KUNDËRSULMON – Gjithsesi, ajo që po mendon t’i bëjë presion ASL-SË së Napolit, ndoshta edhe si rrjedhojë e ngjarjes aspak të bukur të sezonit të kaluar, është Liga Italiane e Futbollit. Sipas institucionit
në fjalë, ka pak raste të raportuara te Napoli, aq sa të ketë shanse që ndeshja të mos zhvillohet dhe kalendari të pësojë deformime të tjera, duke parë edhe se data për të rikuperuar takime nuk duket se ka më. Prandaj, nëse numri i infektimeve në një klub italian nuk është mbi 15, raporton Liga, çdo skuadër duhet t’i përmbahet rregullores dhe Napoli duhet të paraqitet rregullisht që të luajë me Juventusin. Përndryshe, rrezikohet humbja në tavolinë dhe më pas seancat gjyqësore siç ndodhën edhe në sezonin e kaluar.