Testet ANTI-COVID vonuan udhëtimin drejt Ulqinit

Vllaznia ka lënë dje Shkodrën dhe deri në fundjavë do të jetë e akomoduar në Ulqin. Dje ekipi para nisjes për në Ulqin ka bërë siç e kërkojnë edhe rregullat testet ANTICOVID. Testet janë kryer gjatë mëngjesit të djeshëm, ku fatmirësisht i gjithë kontigjenti i lojtarëve dhe stafit teknik ka dalë i pastër. Për këtë specialistët përkatës të shëndetësisë kanë mbërritur në stadiumin “Loro Boriçi” ku në mjediset e dhomës së mjekut Zyhdi Çoba, futbollistët, trajnerët dhe të gjithë grupit që ishte në listë për të udhëtuar drejt Ulqinit për zhvillimin e fazës përgatitore u janë marrë mostrat testuese. Pritja e përgjigjeve ka bërë që plani i hartuar nga drejtuesit e klubit të pësojë një farë zhvendosjeje, pasi siç mësohet akomodimi në hotel dhe dreka ishin planifikuar të ishin në orën 12.00. Vonesa prej dy orësh në mbërritjen e përgjigjeve të testeve COVID-19 ka shtuar akoma më shumë shqetësimin për një gjë të tillë, por edhe frikën se mos ndonjë prej lojtarëve apo stafit mund të rezultojnë pozitiv. Megjithatë, pas afro 2 orësh pritjeje kanë mbërritur edhe përgjigjet e testeve dhe i gjithë ekipi dhe stafi kanë rezultuar negativë. Kësisoj, tekniku Brdariç ka marrë me vete në këto 4-5 ditë të gjithë lojtarët që ka në dispozicion. Ekipi ka lënë Shkodrën në orën 11.30 ku autobusi me kontigjentin e plotë brenda është nisur drejt Ulqinit, aty ku në orët e pasdites është kryer edhe seanca e parë stërvitore. Të shtunën pasdite ose gjatë paradites së të dielës Vllaznia të kthehet në Shkodër, ku sipas programit ekipi do të zhvillojë ndeshjen miqësore me Prishtinën në stadiumin “Loro Boriçi”.