Bezhani: Arkivole kontrabandë, SPAK të hetojë Elez Gjozën

Me anë të një letre për gazetën “Panorama Sport”, ish-presidenti i KOKSH-IT, Viron Bezhani, ndërmori një sulm frontal ndaj kreut të shtangës, Elez Gjozës. Bezhani ftoi SPAK-UN të niste hetim ndaj Gjozës, teksa ndër të tjera në letrën e tij shkruante: “Të dëgjosh Elez Gjozën kur deklaron se KOKSH-IT tani i ka ardhur dinjiteti me zgjedhjet e reja, të vjen një përzierje në stomak, të vjen keq kur duket qartë se çfarë elementesh janë ricikluar e futur në drejtim në sport, si dhe nga kush mbrohet dhe propagandohet KOKSH-I. Shumë njerëz e dinë se çfarë ka bërë dhe me çfarë është marrë në Zvicër Elez Gjoza! Dihet, gjithashtu, historia e Kontrollit të Lartë të Shtetit kur Elezi punonte në tatime dhe abuzonte duke çdoganuar maune me arkivole si të përdorur. Dihet kur ishte kryetar i njësisë Bashkiake nr.2 dhe ndiqej nga organet e drejtësisë se i kishte bërë pasaportizimin 200 qytetarëve në një hyrje dhomë e kuzhinë si garsoniere. Dihet skandali i përbashkët që ka bërë me Kryetarin e Bashkisë Tiranë, ku merr nga kryetari i bashkisë dhuratë shumën prej 100 milionë lekësh (të vjetër) për të paguar gjobën që kishte marrë Federata Shqiptare e Peshëngritjes nga rastet e përsëritura të përdorimit të dopingut! Për këto afera në shuma të mëdha, do të doja edhe një herë të ftoj SPAK-UN që të merret: 1- Me korrupsionin në sport, të hetojë lëvizjet financiare në Bashki, Federatë dhe në KOKSH, dhe konkretisht me këta elementë që kanë gjithë jetën që abuzojnë dhe gjejnë edhe kurajën të flasin për dinjitet. 2- Si dhe të bëjë veting e të verifikojë a është i dënuar në Zvicër Elez Gjoza apo jo?! E, gjithashtu do të ishte shumë interesante të shpallet publikisht, nëse po, për çfarë është dënuar!?”