Ministrja Kushi prezanton projektin: 5 mln euro për masivizimin e sportit
Ministrja e Arsimit dhe e Sportit, Evis Kushi, në fjalimin e saj prezantoi projektin për formalizmin e sportit në shkolla dhe universitete. Gjithashtu, ministrja Kushi bëri me dije se KOKSH do të jetë organizatori dhe bashkërenduesi në këtë projekt: “Jemi mbledhur për të prezantuar një nga projektet më të bukura që do të na shoqërojë gjatë gjithë këtij viti në institucionet shqiptare. Për herë të parë, qeveria shqiptare ka akorduar një fond 5 milionë eurosh për masivizimin e sportit në shkolla dhe në universitete, për krijimin e ekipeve sportive, për organizimin e kampionateve në nivel shkolle, universiteti, bashkie, qarku dhe kombëtar”, tha ndër të tjera fillimisht Kushi, e cila më pas foli për bashkëpunimin me Komitetin Olimpik. “Do të jetë KOKSH, i cili me ekspertizën, me eksperiencën, me impaktin që ka në të gjithë lëvizjen sportive shqiptare do të organizojë dhe do të bashkërendojë të gjithë punën dhe të gjithë aktorët që do të jenë në këtë projekt, duke filluar që nga shkollat, universitetet, bashkitë dhe federatat sportive”, përfundoi ministrja Kushi. Për këtë projekt u prononcua edhe Bora Muzhaqi, ministre për Rininë dhe Fëmijët, e cila ndër të tjera u shpreh: “Nga konsultimet e shumta që kam bërë me të gjithë të rinjtë, diçka që vazhdon të ndihet po njësoj është kërkesa e tyre për më shumë aktivizim sportiv si dhe për më shumë ambiente sportive”. Ndërkohë, Ogerta Manastirliu, ministre e Shëndetësisë dhe Mbrojtjes Sociale, deklaroi: “Unë do ta konsideroja një superinvestim, një program nga më specialët që është ndërtuar ndonjëherë për fëmijët dhe të rinjtë. Ky është një program që i dedikohet sportit, masivizimit të tij, i cili synon të injektojë edukim përmes tij”.