De Silva në formë, por me Vllazninë do ta nisë nga stoli
Shehi provon formacionin, Hoti në majën e sulmit
Orges Shehi po vazh don përgatitjet për sfidën me Vllazninë, ndërkohë që për momentin Devid de Silva nuk planifikohet titullar në sfidën me shkodranët. Skuadra bardheblu zhvilloi stërvitjen e radhës, teksa grupi ishte i plotë. Nga ana tjetër, me të gjithë lojtarët ka punuar edhe Devid de Silva. Sulmuesi ka qenë në formë dhe kjo është parë edhe në stërvitjen e bardhebluve. Trajneri ka parë me kujdes atë që ka dhënë në fushë De Silva, gjithsesi Shehi nuk mendon që ta aktivizojë si titullar në sfidën me Vllazninë. Sulmuesi mund të ketë disa minuta, por me shumë mundësi nuk do të luajë nga fillimi. Kujtojmë që De Silva është blerja më e fundit e Tiranës në Superiore.
FORMACIONI - Ardhja e Devid de Silvës te Tirana nuk është se ndryshon ndonjë gjë të madhe në formacionin bardheblu. Braziliani thjesht ndërrohet kokë më kokë me Ngonë në majën e sulmit. Formacioni konfigurohet me Bekajn në portë. Mbrojtja me Toshevskin, Behiratçen, Hoxhallarin dhe Ismajlgecin. Në mesfushë, Najdovski, Limaj e Totre. Braziliani teorikisht do të luajë në qendër ndërsa nga krahët janë Seferi e Xhixha titullarë të padiskutueshëm në ekipin e Tiranës. Gjithsesi, në sfidën me Vllazninë nga minuta e parë pritet të luajë Hoti. Edhe pse ka qenë me temperaturë, Shehi do t’i besojë lojtarit të ardhur nga Llapi. Ai është provuar dje në qendër të sulmit, së bashku me Xhixhën e Seferin. Nga minuta e parë pritet të luajë Najdovski, i cili ka disa ditë që është bashkuar me grupin.
PËRBALLJET - Me Vllazninë statistikat e Tiranës janë pozitive. Prej dhjetorit të 1998-ës, Tirana dhe Vllaznia kanë luajtur së bashku 73 takime, mes të cilave 41 fitore janë për bardheblutë, 14 për shkodranët dhe 18 takime janë ndarë në barazim. Skuadra kryeqytetase ka epërsi të madhe për sa u përket përballjeve direkte, ndërsa sezonin e fundit Tirana fitoi dy takime, nënkampionët një ndeshje dhe një sfidë tjetër u mbyll në barazim. Këtë sezon, Tirana e ka mundur Vllazninë në Shkodër me golat e Seferit dhe Xhixhës.