Vulosi fitoren e fundit, Gurishta: Mundim Tiranën
Kapiteni: Diferenca me bardheblutë është e rikuperueshme
Tirana-vllaznia ësh të kryendeshja e jav ës së 16-të dhe nëse shikon statistikat, fitorja e shkodranëve në kryeqytet daton që prej 31 marsit 2017. Interesant është fakti se në triumfin e fundit në transfertë të Vllaznisë ka vulosur rezultatin 1-2 kapiteni aktual, Erdenis Gurishta. I kontaktuar dje nga “Panorama Sport”, mbrojtësi i djathtë shkodran foli për “Klasiken” e kampionatit, ndërsa shprehu besimin absolut se diferenca prej 8 pikësh me bardheblutë është e rikuperueshme. Kapiteni komentoi edhe lëvizjet në merkato, teksa sipas tij, edhe nëse klubi nuk ndërhyn, ekipin e konsideron “top”.
Erdenis, është gati Vllaznia për ndeshjen me Tiranën?
Mendoj se po. Pas një minifaze njëjavore në qytetin e Ulqinit, skuadra është gati për sfidën e së shtunës kundër Tiranës. Përballë kemi një ekip të fortë, por Vllaznia i ka të gjitha cilësitë për të marrë atë që kërkon nga kjo ndeshje.
Duke parë diferencën prej 8 pikësh që keni me bardheblutë, duket sikur jeni të dënuar për të fituar?
Ende nuk është mbyllur gjysma e kampionatit, por ne e dimë që diferenca prej 8 pikësh me Tiranën është e rikuperueshme. E rëndësishme është që ta fillojmë këtë vit me rezultat pozitiv. Këtë duhet ta bëjmë që të shtunën në “Air Albania”.
Për herë të fundit keni fituar në kryeqytet 5 vite më parë dhe ka qenë pikërisht goli juaj që ka vulosur triumfin 1-2. Çfarë ndeshjeje prisni këtë herë?
Meqë e kujtuat, uroj të jetë përsëri një ndeshje e njëjtë
(qesh). Ndeshjet ndërmjet Vllaznisë dhe Tiranës gjithmonë kanë qenë të bukura dhe të forta për shkak të rivalitetit, si në fushë dhe tribuna. Përsëri mendoj që do të jetë një sfidë shumë e bukur dhe uroj që në fund të jemi ne fituesit.
Si e parashikoni këtë pjesë të dytë të sezonit dhe a mund të themi që do të jenë disa skuadra në luftën për titull?
Dy fazat e fundit të kampionatit gjithmonë kanë qenë më të vështirat. E tillë do të jetë edhe këtë sezon. Unë besoj se lufta për titull do të jetë deri në javët e fundit mes shumë skuadrave, siç ndodhi edhe sezonin e kaluar.
Nisur nga grupi aktual që ka Vllaznia, si kapiten mendoni se ka nevojë për përforcime?
Së pari, në janar është shumë e vështirë të gjesh lojtarët që dëshiron. Megjithatë, nëse do të bëhet fjalë për ndonjë lojtar vërtet cilësor, sigurisht që do të ishte armë e shtuar për ne. Në rast të kundërt, përsëri mendoj që e kemi kontigjentin ta mbyllim sezonin me sukses.