“Prisni “Prisni Apoloninë Apoloninë e e vërtetë” vërtetë”
“Do të rikthehemi më të fortë e të motivuar për vazhdimësinë e garës”
Kryefjala e këtyre ditëve në kampin fierak ka qenë puna intensive për të qenë gati për fillimin e fazës së dytë të kampionatit. Lojtarët e Apolonisë po stërviten paralelisht në palestër dhe në aneksin e stadiumit “Loni Papuçiu”. Starti i fazës së dytë nuk është aspak i lehtë për fierakët, sepse gara nis me dy transferta, fillimisht me Erzenin e më pas me Shkumbinin. Në prononcimin e dhënë për “Panorama Sport”, portieri Endrit Çako, deklaron se Apolonia po stërvitet maksimalisht për të qenë në formë për pjesën e dytë të kampionatit.
Si po ecën stërvitja e Apolonisë në këto ditë pushimi të kampionatit?
Stërvitja ka qenë me ritme të kënaqshme, pavarësisht se grupi ka qenë pushim rreth një javë për shkak të festave të fundvitit. Jemi rikthyer në stërvitje me seriozitet dhe përqendrim maksimal. Nuk ka vend për pushime, pasi janari është vendimtar për ne, veçanërisht për qëllimet tona në kampionat.
Ju keni pasur minuta të konsiderueshme gjatë fazës së parë. Si paraqitet gjendja juaj fizike, por edhe e lojtarëve të tjerë?
Të gjithë janë në gjendje të mirë fizike. Gjatë këtyre ditëve jemi stërvitur edhe në palestër për shkak të ngarkesës që kemi pasur në fazën e parë. Por, problemet fizike janë tejkaluar dhe jemi në formë optimale për pjesën e mbetur të kampionatit.
Apolonia renditet e shtata. Do të vazhdoni të ngulmoni për kreun?
Të gjithë jemi të motivuar për të dhënë maksimumin në çdo ndeshje dhe jam i bindur që objektivin sezonal do ta arrijmë. Nuk do të jetë e lehtë, por do të japim “shpirtin” në fushën e lojës. Ndeshje pas ndeshje ne e kemi përmirësuar lojën tonë dhe tashmë nuk ka më justifikime për arritjen e rezultateve pozitive.
Mund të themi që fitoret e fundit kanë qenë motivuese për ecurinë?
Ekipi mori shumë besim me fitoret e fundit dhe dëshira jonë ishte që kampionati të mos ndërpritej. Arritëm të merrnim dy fitore radhazi, për më tepër që fituam në transfertë, 0-2 ndaj Vorës. Apolonia do të rikthehet më e fortë dhe më e motivuar për vazhdimësinë në kampionat.
Sa të lehtë e keni punën me teknikun Kanarsa dhe a po dilni në lojën e tij pas shumë javësh?
Trajneri bën maksimumin, që çdo gjë që ai kërkon në stërvitje të jetë e thjeshtë për t’u kuptuar nga ana jonë dhe për të mos pasur asnjë barrierë për shkak të gjuhës. Për sa i përket stilit të lojës, ne jemi duke u perfeksionuar nga java në javë dhe faza e dytë do të jetë fytyra e vërtetë e Apolonisë.