Gënjeshtra mund ta marrë në qafë, Nole në ankth
Sot vendimi, të tjera fakte kundërshtuese për tenistin
Pas apelit në gjykatë, Novak Xhokoviç ës htë një qytetar i lirë, por qëndrimi i tenistit serb vazhdon të jetë në rrezik. Kryesisht për shkak të një dëshmie jo shumë bindëse të Noles, i cili pretendon se ka qenë me COVID në mesin e dhjetorit. Një tjetër përgënjeshtrim i kësaj teorie ka ardhur së fundmi nga gazeta franceze “L’equipe”, e cila më 18 dhjetor i ka dorëzuar një çmim numrit një të botës. “Ndeshja më e rëndësishme e karrierës së Xhokoviçit”, (kështu u shpreh familja e tenistit pas triumfit në gjykatë) ende nuk ka përfunduar. Tani topi ka kaluar te ministri i Emigracionit të Australisë, Aleks Hauke, i cili sot do të komunikojë përfundimisht nëse Xhokoviç do të qëndrojë në vendin e kangurëve apo jo. Vendimi i gjykatësit Antoni Keli erdhi si rrjedhojë e trajtimit të tenistit nga autoritetet policore në aeroport, por fjalën e fundit mbi qëndrimin apo jo në Australi të tenistit do ta thotë qeveria. Por, në orët e fundit në skenë ka dalë një tjetër telash që mund t’ia komplikojë gjërat Xhokoviçit.
DEKLARATA FALSE - Pyetjes së autoriteteve australiane nëse ka bërë udhëtime në 14 ditët e fundit, Nole iu përgjigj me “jo”. Por, fotot dhe videot në rrjetet sociale tregojnë të kundërtën, teksa tenisti fillimisht shfaqet në Beograd e më pas më 31 dhjetor në Marbeja të Spanjës, në Akademinë Soto Tenis. Formulari që ka plotësuar Xhokoviç paralajmëron se nëse jepen informacione false konsiderohet shkelje e rëndë dhe personi në fjalë mund të përballet me masa të forta ndëshkimore. Dhe një provë kundër Xhokoviçit janë
fotot pas datës 16 dhjetor. Ndërsa së fundmi ka dalë një tjetër detaj që e nxjerr zbuluar 34-vjeçarin. E përditshmja “L’equipe” një ditë më parë ka publikuar takimin që ka pasur me Xhokoviçin, teksa këtij të fundit media franceze i ka dorëzuar çmimin e kampionit
të vitit më 18 dhjetor. Këtë e tregon vetë gazetari Frank Ramela, i cili udhëtoi bashkë me fotografin në Beograd për t’i dorëzuar trofeun Xhokoviçit. “Dorëzimi i çmimit u bë pa praninë e tifozëve. Sigurisht Xhokoviç e hoqi maskën gjatë pozave. Ndërsa për 33 minuta tenisti iu përgjigj të gjitha pyetjeve. Ishim në një tavolinë, sigurisht duke respektuar distancën prej 1 metri. Ndërkohë, kërkesën për ta hequr maskën për 5 minuta, Xhokoviç e refuzoi. Kur u ndamë më vendosi dorën pas shpatullave dhe më tha: ‘Përqafoma Parisin e bukur’”, rrëfen gazetari.