Joshua Kimish jashtë forme, “sherr” me veten dhe stërvitje ekstra

COVID-I ka lënë me pasoja yllin bavarez që luajti vetëm 75 minuta

Në ndeshjen e parë të 2022-shit, Bajerni i Mynihut bëri një paraqitje zhgënjyese në shtëpinë e tij. Sigurisht që mungesat e shumta në formacionin e parë bënë që skuadra kampione të vuajë jo pak ndaj Gladbahut, e cila u tregua dinake duke marrë në shtëpi tri pikët.

Një nga lojtarët më të inatosur në fund të ndeshjes ishte Joshua Kimish. Mesfushori nuk e kishte vetëm me rezultatin, por dhe me formën e tij fizike. Ai nuk ishte i kënaqur me faktin që luajti vetëm 74 minuta. Por, duke parë pasojat që i la COVID-I në mushkëri, 26-vjeçari duhet të jetë i kënaqur dhe me aq. Ai mungoi në tetë ndeshje që Bajerni luajti nga muaji tetor deri në fund të dhjetorit. “Josh nuk mund të luante më shumë se aq. E pashë që kishte lodhje fizike dhe mendova që është më mirë që ai të pushonte dhe të mos rrezikonte ndonjë dëmtim”, tha trajneri Nagelsman pas ndeshjes duke justifikuar zëvendësimin e mesfushorit. JASHTË ROLIT

Nuk ishte eksperienca e vetme që Kimish përjetoi në atë

ndeshje. Për herë të parë në epokën e Nagelsmanit, mesfushori i qendrës luajti si mbrojtës me tre. Ishte më se e pritshme që Kimish të luante në atë pozicion duke parë mungesat e shumta para ndeshjes. Në ndeshjen ndaj Këlnit ai pritet të rikthehet sërish në pozicionin e tij të preferuar, atë të regjisorit.

STËRVITJE JASHTË ORARIT Çfarë duhet të bësh kur nuk je në kondicionin e duhur fizik? Të stërvitesh më shumë. Këtë gjë ka bërë dhe ylli gjerman që dje erdhi i pari dhe u largua i fundit nga qendra stërvitore. Pasi kreu stërvitjen me skuadrën, Kimish kaloi dhe shumë minuta të tjera në palestër duke punuar me fizioterapistin

e skuadrës. Ai kërkon të rikthehet sa më shpejt në kondicionin e tij më të mirë fizik. Përpara është një fazë e dytë e mbushur me ndeshje të rëndësishme si në kampionat ashtu dhe në Champions. Për të mos harruar në fund të vitit dhe kampionatin Botëror, ku Flik pret një Kimish në versionin lider.