Smaçi: Të mos përsërisim gabimet, Apolonia ka nevojë për përforcime

Apolonia do ta nisë fazën e dytë në transfertë ndaj Erzenit. Pozicioni i fierakëve në renditje nuk lejon më ndalesa, sidomos ndaj kundërshtarëve direkt për elitën. Në një prononcim të dhënë për “Panorama Sport”, mesfushori Erisildo Smaçi tha se Apolonia po stërvitet me intensitet për transfertat e muajit janar, pasi dy ndeshjet e para i ka jashtë. Ai pranoi se ekipi ka nevojë për afrime në merkato, sepse konkurrenca u bën mirë të gjithëve në skuadër.

Smaçi, a është gati Apolonia për startin e fazës së dytë?

Po stërvitemi maksimalisht për nisjen e fazës së dytë dhe synojmë ta fillojmë me rezultate pozitive, sikurse e mbyllëm fazën e parë në muajin dhjetor. I vlerësojmë kundërshtarët tanë, por në fund Apolonia bën llogaritë e veta për të arritur qëllimin e saj final.

I qëndroni objektivit sezonal, pavarësisht pozicionit në renditje?

Objektivi ynë sezonal është rikthimi në Superiore, mirëpo ky objektiv arrihet vetëm duke i marrë ndeshjet me radhë. Pa dyshim që pozicioni ynë në renditje është ende larg pritshmërive, por matematika na lejon që të luftojmë deri në fund për vendet e para në tabelën e renditjes.

A ka nevojë Apolonia të ndërhyjë në merkato?

Po, ka nevojë për ndërhyrje, sepse konkurrenca në ekip na bën mirë të gjithëve. Gjatë fazës së parë, kemi gabuar jo pak herë dhe repartet tona kanë pasur probleme të dukshme në disa ndeshje të rëndësishme. Prurjet e reja sjellin një ritëm tjetër në skuadër dhe sigurisht që Apolonia duhet të përmirësohet në pjesën e mbetur të kampionatit.

Si po shkon puna juaj e përditshme me trajnerin italian Juri Kanarsa?

Të them të drejtën, po kuptohemi mjaft mirë. Gjithmonë na qëndron afër, na udhëzon dhe na orienton drejt në fushën e lojës. Së bashku besojmë se në këtë fazë të dytë të kampionatit nuk do të përsëriten më gabimet e fazës së parë. HILMI SALIU