Tirana rivesh bardheblu Daboviçin, serbja tërbon rrjetin
Foto “hot”, 39-vjeçarja nuk përmbahet në “Instagram”
Tirana Barleti në bas ketboll për femra ka bërë një tjetër goditje të rëndësishme në merkato. Skuadra kryeqytetase ka nënshkruar me lojtaren serbe Milica Daboviç. 39-vjeçarja ka një eksperiencë të madhe në basketbollin europian, ndërsa për shumë vite ka mbajtur edhe rolin e kapitenes te Serbia. Ajo regjistron një palmares për t’u pasur zili, si medalja e bronztë në Lojërat Olimpike “Rio 2016” apo titulli kampion në “Eurobasket 2015”. Gjithashtu Daboviç koleksionon 4 tituj të Ligës së Serbisë, 3 Kupa, si dhe është shpallur 2 herë kampione në Ligën e Adriatikut. Për Daboviçin, ky do të jetë një rikthim te skuadra Tirana Barleti, pasi edhe në sezonin e kaluar ajo ishte për disa muaj pjesë e skuadrës bardheblu. Basketbollistja është një njohje e vjetër e kampionatit tonë, teksa në sezonin 2018-2019 ka luajtur për skuadrën e Flamurtarit, ndërsa në edicionin 20192020 ka veshur edhe fanellën e Vllaznisë. Lajmin për nënshkrimin me lojtaren serbe e ka dhënë vetë klubi bardheblu me anë të një postimi në rrjetet sociale, ndërsa Daboviç pritet të mbërrijë sot në Tiranë për t’iu bashkuar skuadrës.
E PAPËRMBAJTSHME NË RRJETET SOCIALE – Përveç aftësive në parket, basketbollistja Milica Daboviç është gjithashtu shumë e ndjekur edhe në rrjetet sociale, teksa vetëm në “Instagram” numëron mbi 159 mijë fansa. Modelja njihet për fotot provokuese, teksa nuk ngurron t’i ekspozojë linjat trupore në publikimet e saj. Me një trup të mbushur me tatuazhe, disa prej tyre madje pranë pjesëve intime, Daboviç,
tërheq shumë vëmendje. Në prag të zbarkimit në Shqipëri, basketbollistja ka menduar që t’i rrisë temperaturat e dimrit, teksa ka rikthyer verën me anë të një postimi ku shfaqet me bikini, duke marrë një lumë me pëlqime dhe komplimente nga fansat.
ERTA BUJARI: MERKATOJA NUK MBARON KËTU - Eliverta Bujari, kapitene, lidere dhe trajnere në fushë te Tirana Barleti, ka treguar objektivat e skuadrës për “Panorama
Sport”, ndërsa thekson se merkatoja ende nuk është mbyllur për ekipin kryeqytetas, duke iu dërguar një mesazh të qartë rivaleve: “Presim që të afrojmë edhe një lojtare qendre dhe besoj se atëherë mund ta quajmë të mbyllur merkaton, pasi jemi të kompletuar. E rëndësishme është që ta nisim Kupën e Shqipërisë me një grup të plotë lojtaresh, pasi synojmë fitimin e këtij trofeu. Më pas të shikojmë, por sigurisht objektivi ynë kryesor mbetet fitimi i titullit kampion. E filluam keq kampionatin, por arritëm të rikuperojmë dhe tani gjithçka është në dorën tonë”, deklaron kapitenia bardheblu, e cila me ekipin që plotësohet nga ditë në ditë, tashmë nuk i druhet më kombinacioneve të çuditshme të rezultateve të kundërshtareve për zonën “play off”, pasi Tirana Barleti e ka gjithçka në dorën e saj.