Mesdhetaret, Fidel Ylli prezanton Kombëtaren
Të dielën, ceremonia e dorëzimit të flamurit Presidenti i KOKSH: Në Algjeri për të fituar medalje
Në ambientet e Ko mitetit Olimpik dje është mbajtur konferenca e prezantimit për Kombëtaren kuqezi, e cila do të marrë pjesë në Lojërat Mesdhetare “Oran 2022” që do të mbahen në Algjeri nga data 25 qershor deri më 5 korrik. Shqipëria në këtë eveniment do të përfaqësohet me 29 sportistë, ndërsa delegacioni shqiptar përbëhet nga 60 persona, ku shefe delegacioni do të jetë Luna Methasani. Në konferencën për shtyp, presidenti i KOKSH-IT, Fidel Ylli, teksa bëri prezantimin e skuadrës, zbuloi gjithashtu edhe objektivat, teksa tha se Shqipëria shkon në Mesdhetare për medalje në disa sporte. Gjithashtu, u firmosën edhe kontratat e zakonshme nga i gjithë delegacioni që do të udhëtojë në Algjeri. Shqipëria do të garojë në Lojërat Mesdhetare me 29 sportistë në 10 sporte të ndryshme.
FIDEL YLLI – Kreu i Komitetit Olimpik ndër të tjera në fjalimin e tij gjatë prezantimit theksoi: “Shqipëria edhe në këtë edicion shkon me pretendime të mëdha dhe për medalje. Kemi pritshmëri në atletikë, në boks, në gjimnastikë, në peshëngritje, në mundje, por nuk ngelen pas qitja, xhudo, noti, tenis aspo taekwondoja. Sportistët tanë po zhvillojnë faza përgatitore intensive. KOKSH-I u ka mundësuar të gjitha kushtet dhe u ka siguruar gjithashtu uniformat e përfaqësimit, me një set të kompletuar, siguracionin e shëndetit dhe të udhëtimit, procedurat e regjistrimit dhe vizave. Sigurimin e akomodimit të fshatit mesdhetar dhe çdo detaj tjetër”. Ndërkohë në Lojërat Mesdhetare nuk do të garojë as Briken Calja, i cili ndonëse është i pranishëm në delegacion, duket se ende nuk është rikuperuar nga dëmtimi.
MUNGOJNË BASKETBOLLI DHE VOLEJBOLLI – Në Mesdhetare Shqipëria nuk do të garojë në sporte ekipore, ndërsa Fidel Ylli konfirmon se mungesa e basketbollit dhe volejbollit vjen për shkak të buxhetit: “Këto dy sporte nuk kanë pasur buxhet, pasi buxheti u ka ardhur në muajin maj dhe nuk ka qenë koha e mjaftueshme”, thotë ndër të tjera Ylli. Ndërkohë i pyetur nëse parashikonte shpërblime në rast të fitimit të medaljeve nga ana e qeverisë apo dhe e KOKSH-IT, Ylli sqaron: “Nga ana e
KOKSH-IT nuk ka buxhet tjetër përveçse akomodimin, udhëtimin e atyre që përmendëm. Ndërsa qeveria ka shpërblimin sipas VKM, për vendet që do zënë sportistët dhe skemën e shpërblimit”. Më tej Ylli evidentoi gjithashtu edhe investimet e bëra në infrastrukturën sportive. Të dielën në orën 10:00 do të zhvillohet edhe ceremonia e dorëzimit të flamurit, ku për herë të dytë pas Lojërave Olimpike, do ta japë kryeministri Edi Rama. Flamurmbajtësit e Shqipërisë do të jenë tenistja Gresi Bajri dhe boksieri Alban Beqiri. Nisja e ekipit kombëtar për në Algjeri do të bëhet në datën 21 qershor.