Saki: “Lu-di-la” s’më bind, Interi të gjejë zgjidhje
Arrigo Saki shuan entuziazmin e tifozëve të Interit për merkaton sulmuese. I intervistuar nga “La Gazzetta dello Sport”, ishtrajneri i nënvizon skepticizmin e tij për treshen e frikshme të përbërë nga Lukaku, Lautaro dhe Dibala (“Lu-di-la”).
Një ide e zbatueshme ajo e treshes sulmuese për Interin?
Gjithmonë kam menduar se skuadrat nuk bëhen me figura. Isha te Reali i Madridit si drejtor teknik në 2004-‘05 dhe më kërkuan të isha trajner. E dini nga cilët ishte i përbërë sulmi? Bekham, Raul, Ronaldo, Zidan, Figo. Në stol dy zëvendësuesit e parë ishin Morientes dhe Ouen. Nuk ishte një ekip, ishte një film, por nuk kishte skenar. Kështu që, unë falënderova presidentin dhe refuzova. Për të mbrojtur nevojiteshin dy shkatërrues që të mbanin jelek antiplumb. Ekipet kanë nevojë për ekuilibër.
Pengesa kryesore për të parë së bashku Lukakun, Lautaron dhe Dibalën?
Në futbollin modern, njëmbëdhjetë lojtarë janë gjithmonë aktivë. Ata duhet të lëvizin vazhdimisht, duhet të marrin pjesë në manovra, duhet të bashkëpunojnë. Vetëm në këtë mënyrë mund të mendojmë të rikuperojmë topin shpejt, kur atë e kanë kundërshtarët. Nëse tre lojtarë i dorëzohen armikut, do të thotë se në fazën mbrojtëse jemi tetë në vend të njëmbëdhjetë. Në këto rrethana fryma e sakrificës është thelbësore dhe karakteristikat fizike të lojtarëve janë themelore. Nuk mendoj, por mund edhe të gaboj kur them që Lukaku, Lautaro dhe Dibala i kanë këto cilësi.
Pra i sugjeroni Inzagit të luajë me dy sulmues?
Pa dyshim. Lukaku dhe Lautaro, së bashku, bënë shumë mirë me Konten dhe fituan titullin. Lautaro dhe Dibala, si argjentinas, e kuptojnë njëri-tjetrin. Dhe Lukaku-dybala është një përzierje e bukur e fantazisë dhe fuqisë. Nëse përdor “tredhëmbëshin”, Inzagi do të duhej të sakrifikonte njërin mes Çalhanoglusë dhe Mikhitarianit.