Warriors kampion në NBA, Bostoni KO në finalen 6
Feston Golden Stejt, fiton titullin e shtatë në historia Stefën Kërri fenomenal, më në fund vjen edhe çmimi MVP
Përsëri ata! Golden Stejt shpallen sërish kampionë në NBA, duke fituar titullin e katërt që prej vitit 2015 dhe të shtatin në historinë e klubit. Formacioni i trajnerit Kerr triumfoi me rezultatin 103-90 në finalen e gjashtë kundër Bostonit duke e mbyllur serinë 4-2, për t’u kurorëzuar kampion në shtëpinë e kundërshtarëve. Suksesi i katërt në kampionatin më spektakolar të basketbollit në botë edhe për trajnerin Kerr, Drajmond Grin, Klei Tompson dhe Andre Igoudala. Titulli i katërt edhe për Stefën Kërrin, i cili më në fund me meritë të plotë fiton për herë të parë në karrierë çmimin MVP të finaleve. Kështu, Warriors nuk e shpërdorojnë “match point”in e parë dhe me tre fitore radhazi rikthehen në majën e NBA-SË. Golden Stejt e ndërton rrugën drejt titullit që në pjesën e parë, teksa i fiton dy periodat e para përkatësisht 27-22 dhe 27-17, duke shkuar në pushimin ndërmjet dy pjesëve me +15 pikë avantazh (54-39), ndërsa për tu veçuar ishte një superparcial 21-0 (rekord për “Finals”). Në pjesën e dytë, Bostoni tenton përmbysjen, por miqtë nuk lëshojnë dhe arrijnë ta ruajnë më së miri epërsinë e krijuar, duke e prenotuar shumë para sirenës përfundimtare triumfin. Kështu, gjithçka mbyllet +13 pikë avantazh për Golden Stejt që shpërthen në festë në parketin e “TD Garden”. Megjithatë, nuk mungojnë as duartrokitjet nga publiku
vendës për skuadrën e tyre të zemrës, me Celtics që dalin gjithsesi me kokën lart. Protagonisti absolut i ndeshjes dhe i titullit ishte Stefën Kërri, autor i 34 pikëve, 7 ribaundeve dhe 7 asisteve. Ndërsa qershia mbi tortë ishte çmimi MVP, një titull individual që i
mungonte karrierës së jashtëzakonshme të numrit 30. Një sezon i paharruar për Kërrin, me unazën e katërt në kasafortë apo rekordin e trepikëshave. Por ky sezon është edhe i Klai Tompsonit, i cili ndonëse nuk ishte deciziv në finalen 6, mund t’i gëzohet
një triumfi që dukej i pamundur, mbi të gjitha për 941 ditët që qëndroi jashtë parketit për shkak të dëmtimit të dyfishtë. Nuk ka se si të mos buzëqeshë as trajneri Stiv Kerr, i cili bën të tijën unazën e nëntë, të katërtën si trajner. Ndërkohë, për të besuarit e trajneri Udoka nuk mjaftuan 34 pikët e Xhalen Braun, ndërsa Xheison Tatum shënoi vetëm 13. Kështu, NBA mbyll një tjetër edicion të jashtëzakonshëm, me emocione të forta dhe me spektakël, ashtu sikurse di ta dhurojë vetëm kompeticioni më i bukur i basketbollit në Botë.