“Ishin ekip shumë i dobët, por presidenti Bardhi nuk na dëgjoi”
Çeço: Dinamo nuk u ndez kurrë, ja pse kishte probleme të theksuara
Iljaz Çeço nuk mund të rrinte pa komentuar edhe rënien e Dinamos. Ai tregon edhe për takimin që ka pasur me presidentin e bluve, Ardian Bardhi, në fillimin e sezonit 2021-2022. “I gënjeu fitorja e parë në kampionat, por ajo Dinamo nga ana taktike dhe në gjërat më të thjeshta të futbollit ishte shumë e dobët. Kishte lojtarë që nuk dinin të dublonin dhe pësonin nga gjashtë gola. Derisa nuk ke mbrojtje, të paktën taktikisht duhet të ndryshosh, por as kjo nuk ndodhi. Nuk dinin as të qëndronin të mbyllur në mbrojtje për të marrë ndonjë pikë. Dinamo nuk kishte një bosht. Gjithmonë ka pasur mesfushorë dhe sulmuese të mirë, sidomos teknikisht. Lojën më të bukur në Shqipëri e ka bërë Dinamo. Futbolli modern erdhi në klubin tonë, sepse kemi pasur lojtarë të mëdhenj. Presidentit të Dinamos, Bardhi, ia kam thënë që në fillim: ‘Nuk ke skuadër’. Na ftoi para se të niste kampionati dhe vërejtjet që kisha ia thashë, duke filluar nga ndryshimi i stemës. Germa D që ka Dinamo në fanellë historikisht u zvogëlua. Të paktën, mirë që ekipi ishte i dobët, por nëse ajo germë është në fanellë e dukshme dhe e madhe, të paktën fiton disi psikologjikisht. Sugjerimet tona për presidentin nuk u morën parasysh. I kërkuam të formonte një kryesi me ishlojtarët dhe të jepnim mendimet tona. Duke pasur një mendim ndryshe, gjërat bëhen edhe më mirë. Kërkesat që bëmë si ish-futbollistë që e ndiejmë këtë fanellë, me synimin e vetëm për t’i ardhur në ndihmë klubit, nuk na u morën parasysh. Isha i gatshëm t’i jepja të gjithë dokumentacionin presidentit që nga krijimi i klubit, pasi e kam unë në shtëpi, duke qenë se në vitet 1981-1987 kam qenë drejtues. Të gjithë dinamovitët ishin të gatshëm dhe masat duheshin marrë sa më shpejt. Me atë ekip që kishte Dinamo, duhet të bënte stërvitjen më të thjeshtë. Kishte probleme të theksuara, qoftë në markime dhe dublime. Në goditjet standarde ishte shumë dobët. Nuk e prisja që do të binin nga Superiorja. Kur ekipi nuk ka përgatitje fizike, e merr gradualisht gjatë kampionatit. Mirëpo, e tmerrshme ishte që Dinamo nuk u ndez asnjëherë gjithë sezonin”, deklaroi Çeço për “Panorama Sport”. Ish-mesfushori ka fituar gjithçka me fanellën e bluve në vitet ‘60‘70, duke qenë ndër lojtarët më të mirë.