Do ruhet grupi, Ribaj: Vendimi i duhur!

Andi Ribaj është ndër të parët lojtarë që është konfirmuar në Vlorë. Kapiteni ka marrë “bekimin” e administratorit Sinan Idrizi. Në një intervistë për “Panorama Sport”, sulmuesi shprehet shumë i lumtur me ruajtjen e grupit, ndonëse afrimet i quan të domosdoshme. Beson tek aftësitë e kreut të klubit në drejtim të merkatos dhe qartazi e thotë se ngjitja do të jetë misioni i padiktueshëm.

Një pjesë e titullarëve kanë marrë “bekimin” e Flamurtarit. A është Ribaj në këtë listë?

Më kanë kontaktuar dhe po presim ditën kur të fillojmë stërvitjen. Drejtuesit po punojnë në drejtim të ndërtimit të skuadrës, sikundër kam informacion. Megjithatë, unë po përgatitem individualisht. Edhe në këto momente, jam duke u stërvitur. Kështu që nuk kam pushuar asnjë ditë, pasi duhet që të ruhet gjendja fizike.

Çfarë ju kanë thënë?

Patjetër që kam folur me drejtuesit dhe presidentin. Kemi folur edhe për të ardhmen. Kam folur me Idrizin dhe e falënderoj për vlerësimin që ka për mua. Tani pres që të nisim punën. Unë e kam thënë edhe më parë se do ta mbyll karrierën në Vlorë. Ndihem si në shtëpinë time dhe shumë i respektuar nga të gjithë. Është një ambient që të lë të punosh lirshëm dhe pa presion. Do qëndroj për ta çuar Flamurtarin ku e ka vendin dhe ku e meriton.

Në klub po mendojnë që të ruajnë grupin e lojtarëve. Keni një koment?

Jam shumë dakord me këtë gjë. Kjo, pasi ka qenë një grup me djem të shkëlqyer dhe kemi kaluar shumë mirë. Ky grup ka bërë mirë dhe e ka arritur objektivin. Skuadra është tashmë një kategori më lart. Janë lojtarë me shumë eksperiencë dhe që kanë luajtur në Superiore. Vlerësoj çdo lojtar për çfarë ka dhënë dhe për vlerat që ka.

Çfarë këshilloni për merkaton?

Nuk kam ndonjë këshillë. Presidenti bën gjithmonë gjërat e duhura në këtë pjesë.

Ngjitet Flamurtari në elitë për 100-vjetor?

Normalisht që do të ngjitet. Nuk kemi asnjë dyshim për këtë sepse presidenti po bën çdo gjë për ta arritur ngritjen për 100-vjetorin e klubit. Ky është qëllimi ynë kryesor.