Salvador Kaçaj, “Kalorës i Urdhrit të Flamurit”

Ish-futbollisti i Kombëtares shqiptare, Salvador Kaçaj, është vlerësuar nga presidenti i Republikës së Shqipërisë, zoti Ilir Meta, me titullin “Kalorës i Urdhrit të Flamurit”. Në ceremoninë e organizuar të mërkurën, Kaçaj u shfaq i emocionuar, teksa mori fjalën e rastit. 54vjeçari nga Lezha ka bërë karrierë jo vetëm në Shqipëri, ku luajti me skuadrën e vendlindjes, Besëlidhjen, Skënderbeun, Vllazninë dhe Luftëtarin. Gjithashtu për shumë vite ai ka luajtur në Greqi dhe Qipro për skuadra si Kalithea, Athinaikos, Olimpiakos Nikosia dhe Levadhiakos. “Zoti president, ju falënderoj për vlerësimin që keni bërë për figurat e spikatura në sport dhe veçanërisht për futbollin. Kjo medalje që marr është e Lezhës dhe lezhjanëve, sepse pa ata unë as nuk do të isha këtu dhe as nuk do të luaja futboll. Zoti e bekoftë Lezhën dhe shqiptarët. Jetë të gjatë zotit Meta dhe karrierë sa më të mirë”, ka thënë Kaçaj i emocionuar. Ish-futbollisti ka bërë edhe një postim në faqen zyrtare pas këtij vlerësimi. “Të nderuar miq, shokë e dashamirës, pata fatin të dekorohem së bashku me disa personazhe të tjerë nga Lezha, nga shkëlqesia e tij, presidenti i Republikës së Shqipërisë, zoti Ilir Meta. Titulli ‘Kalorës i Urdhrit të Flamurit’ më nderon pa fund për atë që kam arritur në jetë. Gjithçka për këto momente emocionuese më sjellin në mendje familjen time, miqtë dhe bashkëqytetarët lezhjanë. Kjo medalje, përveç falënderimeve që vijnë te ju, përcjell me zemër mirënjohjen e pamasë. Të gjithë lezhjanët dhe ata që më mbështetën në jetë kanë pjesën e tyre në këtë laureim”, shkruante ndër të tjera Salvador Kaçaj në “Facebook”.