Bëri një “mal” me gola, Danaj: Iki nga Besëlidhja vetëm për elitën
“Kunji” i mesfushorit: Jam i kënaqur me 17 golat e mi... realë
Redon Danaj nuk tundohet lehtë. As që e ka në plan ta braktisë Besëlidhjen, nëse bëhet fjalë për Kategorinë e Parë. Megjithatë, situata mund të ndryshonte nëse do t’i vinte ndonjë ofertë e parefuzueshme nga elita. Lezhjanët vërtet vuajtën sezonin e fundit, por mesfushori bëri superkampionat. Realizoi plot 17 gola dhe dha një “mal” me asiste, aq sa për pak sa mori “Këpucën e Artë”. E donte aq shumë një trofe personal, por sërish ndihet fitimtar. Në një deklaratë të dhënë për “Panorama Sport”, 21-vjeçari tregon se si po i kalon pushimet, por edhe planet për të ardhmen. “Jemi në kulmin e pushimeve verore, por unë çdo ditë po stërvitem. Edhe pse individualisht, vazhdoj të kryej ushtrime fizike. Dua të mbaj trupin në formë dhe jem gati. Në kohë merkatoje është e pashmangshme që të mos kesh oferta. As mua nuk më kanë munguar.
Më kanë ardhur disa, por nuk kam vendosur asgjë. Jam pjesë e Besëlidhjes dhe dua që ta vijoj kontratën. Mua vetëm ofertat e klubeve të Superiores mund të më tundojnë. Nëse bëhet fjalë për ato të Kategorisë së Parë, preferoj Besëlidhjen. Jam mirë këtu, jam
në shtëpinë time. Besëlidhja është një ekip që meriton ngjitjen në nivele të larta, por rrethanat e kanë ngujuar kaq gjatë në inferiore. Sezoni që lamë pas për ne ishte sa dramatik, por edhe plot emocional. Fazën e dytë zhvilluam një gjysmësezon deri diku të suksesshëm dhe në fund mbijetuam pa probleme, në një kohë që 4 ekipe zbritën direkt dhe dy iu nënshtruan ndeshjeve shtesë të ‘play out’-it. Sezoni i ardhshëm pritet të jetë shumë më konkurrues dhe mjaft i fortë, pasi janë gati të gjitha ekipet që do të luftojnë për elitën. Golat? Shënova 17 herë, duke qenë deri në ndeshjet e fundit në vend të parë të listës së golashënuesve. Në mënyrë jo fort të qartë u shënuan lumë golash, aq sa mua më spostuan më poshtë. Gjithsesi, unë jam i kënaqur me sasinë e golave realë që kam shënuar pasi shumica e tyre kanë qenë përcaktues në rezultat duke u përkthyer në pikë shpëtimi për ekipin tim. Objektivat për vitin tjetër do t’i mësojmë kur të nisim fazën përgatitore. E megjithatë, e kam të qartë se përpos ngjitjes... nuk mund të ketë tjetër mision”, përfundoi Danaj.