Rikthimet në modë, Barça po mendon për Nejmarin dhe Suarezin

PSG u ofron brazilianin për 50 milionë euro katalanasve

Rikthimet, me sa duket, janë në modë këtë merkato vere. Pas Lukakut tek Interi dhe zërave për një rikthim të mundshëm të Kristiano Ronaldos te Juventusi, tani radha është e Barcelonës. Katalanasit kanë menduar dy ish-futbollistë të klubit për t’i afruar në këtë merkato. Bëhet fjalë për Nejmarin, e ardhmja e të cilit te Parisi mbetet ende një mister. Sulmuesi brazilian mund t’u japë lamtumirën kampionëve të Francës gjatë kësaj merkatoje pas situatës problematike me drejtuesit e klubit. Ka qenë emisioni i famshëm sportiv “El Chiringuito” që gjatë transmetimit “live” ka bërë të ditur lajmin, duke theksuar se PSGJA është e gatshme ta lërë brazilianin të lirë dhe ka shkuar deri aty sa ka raportuar se francezët ia kanë ofruar kartonin e tij Barcelonës duke i kërkuar një shumë rreth 50 milionë euro për të kompletuar transferimin. Problemet financiare të klubit spanjoll si dhe situata me Levandovskin u japin pak mundësi lëvizjeje katalanasve në merkato, por drejtuesit e klubit duket se e kanë në konsideratë ofertën e Parisit për t’i dhuruar trajnerit Ksavi një tjetër blerje të bujshme.

SUAREZ - Disa orë pas lajmit se PSG-JA i kishte ofruar Barcelonës kartonin e Nejmarit, e përditshmja “Sport” publikoi një tjetër lajm të bujshëm, ku thuhej se katalanasit kishin kontaktuar agjentin e Suarezit për të kërkuar informacion lidhur me mundësinë e një rikthimi në klub. Tifozët e Barcelonës pa dyshim që e kujtojnë me shumë nostalgji kohën kur treshja e përbërë nga Mesi, Suarez dhe Nejmar dominonte Europën, por raportimet e fundit mund t’i bëjnë fansat të ëndërrojnë sërish

t’i shohin të luajnë së bashku, të paktën Nejmarin dhe Suarezin. 35-vjeçari duhet ende të zgjedhë klubin e tij të radhës pas largimit nga Atletikoja, ku ideja e ribashkimit me ish-skuadrën mund ta bindë të bëjë një rikthim të bujshëm në pritje edhe të pjesës tjetër të treshes së famshme.