Bytyçi: Ishte skenar, udhëheqja nuk e donte kampione Tiranën
Ish-futbollisti i bardhebluve në vitin 1967
Luigj Bytyçi, një rekordmen titujsh me bardheblutë, thotë se Tirana u vodh. Sipas tij, sistemi i asaj kohe donte që titullin t’ia jepnin Dinamos dhe gjetën sebep duke i dënuar të dyja skuadrat e tjera të kryeqytetit. Fiks 55 vite nga ajo ngjarje, Luigj Bytyçi rrëfen ekskluzivisht për gazetën se çfarë ndodhi në derbin Partizani-17 Nëntori 1-2, të luajtur më 24 qershor të vitit 1967. “Për kampionatin 1967-ës dhe mund t’ju them me bindje se ne e meritonim atë titull. Na dënuan padrejtësisht dhe e mori Dinamo në fund. Kjo dihet botërisht. Në 1967, mbaj mend që ne kemi qenë në korridor ku pati një përplasje me fjalë që nisi nga ata të Partizanit, sepse ne kishim fituar dhe nuk kishim pse bënim fjalë. Ka qenë Gim Dizdari i Kavajës, i cili provokoi Osman Memën. Aty në korridor ishim me Ben Bukovikun, Fatmir Frashërin dhe u krijua një antagonizëm i asaj natyre, pa arsye. Ata të Partizanit bënin pak më shumë zhurmë, por gjithsesi u mbyll pa ndonjë gjë të rëndë kjo histori. Kur më pas shohim të nesërmen, ishte bërë kiameti. Ishte një gjë shumë e ekzagjeruar. Unë mund të them se ishte protagonizmi ose dëshira e shokëve të udhëheqjes që Tirana të mos e merrte titullin. Ajo
Tiranë kishte një superskuadër. Ne jo vetëm kaq, pra jo vetëm kampionatin, por e kemi marrë pesë herë me radhë kupën. Dua të them që kjo ishte e përgatitur. Unë tani që po flas me ju në telefon jam në tavolinë me një shokun tim që vjen gjithashtu nga bota e sportit. Ka qenë edhe shefi i sporteve të Elbasanit, Xhevahir Trushani. Dhe ai po qesh. E dini pse? Sepse e mori vesh gjithë bota që ngjarja ka qenë provokative dhe është trajtuar disa herë nëpër gazeta, por konkluzioni është se Tiranën nuk e deshi udhëheqja kampione atë vit”, deklaroi ndër të tjera për “Panorama Sport” ish-futbollisti i Tiranës, Luigj Bytyçi.