Takaj konfirmon Memellin si trajner
SKËNDERBEU/ Presidenti zbulon marrëveshjen për rikthimin e teknikut pogradecar “Vlerësuam punën e tij në të shkuarën, objektiv final ngjitja në Kategorinë Superiore”
Nuk ka më dilema në Korçë. Migen Memelli është zyrtarisht trajneri i Skënderbeut për sezonin e ardhshëm. Pas bisedimeve që zgjatën disa ditë, duket se palët kanë rënë dakord për të arritur një marrëveshje përfundimtare. Zyrtarizimi konfirmohet nga vetë presidenti Ardjan Takaj, i cili për “Panorama Sport” bën me dije se Migen Memelli do të jetë trajneri i Skënderbeu për një sezon. Marrëveshja, po sipas presidentit të Skënderbeut, është mbyllur një ditë më parë, teksa janë zgjidhur të gjitha kushtet e vendosura nga trajneri për rikthimin e tij në Korçë. I kontaktuar nga gazeta, Takaj u shpreh: “Po, kemi arritur zyrtarisht marrëveshjen me Migen Memellin për të qenë në krye të pankinës së Skënderbeut. Ne si klub kemi vlerësuar maksimalisht punën e bërë nga Memelli, ndaj e kemi parë si njeriun e duhur për t’i besuar nisjen e këtij projekti. Kemi rënë dakord për një marrëveshje njëvjeçare me objektiv final ngjitjen e Skënderbeut në elitë. Të gjitha detajet janë mbyllur tashmë dhe të jeni të bindur se do të ndërtojmë një ekip cilësor”. Me zyrtarizimin e Memellit Skënderbeu zgjidh kështu të gjitha dilemat për kryepankinën.
Memelli rikthehet në juglindje pas katër muajsh, pasi u largua nga drejtimi i ekipit për shkak të mungesës së rezultateve. Pozicioni i vështirë i Skënderbeut në fund të muajit mars dhe mosmarrja
e përgjigjes së duhur nga lojtarët e detyruan trajnerin pogradecar që të japë dorëheqjen për të lënë rrugë të lirë për ndryshim në klub. Me rikthimin e tij, Memelli do të gjejë pjesën më të madhe të lojtarëve që kishte lënë në Korçë pas largimit të tij, një grup që deri diku e njeh për nga cilësitë dhe që do të forcohet me elementë të tjerë kualitativ për të bërë të mundur kthimin direkt në elitën e futbollit shqiptar. Edhe për këtë arsye duket se Takaj ka ngulmuar që të rikthejë Migen Memellin në krye të pankinës së Skënderbeut. Trajneri 42-vjeçar e njeh mirë ambientin dhe filozofinë e klubit, ndaj nuk ka nevojë për ambientim, vetëm për veprim.