Ronaldo bën lëmsh gjithë Europën
I gjejnë çdo ditë një destinacion të ri, por portugezi do të qëndrojë në Mançester Sipas “AS” e do Bajerni, lajmi përgënjeshtrohet nga mediat dhe vetë drejtori Salihamixhiç
Kristiano Ronaldo pritet të qëndrojë në Mançester këtë sezon dhe do të nisë fazën përgatitore me “Djajtë” në fillim të korrikut pavarësisht zërave se ai është gati të largohet nga “Old Trafford” këtë verë. Gazeta portugeze “Record” ishte e fundit që nxiti spekulimet se sulmuesi 37-vjeçar do të largohet pas vetëm një sezoni në Mançester, sepse ka frikë se trajneri i ri Erik ten Hag nuk i ka armët e duhura për të luftuar për trofe dhe se sulmuesi është i zhgënjyer me merkaton e klubit deri tani (nuk ka bërë ende asnjë blerje). Por portugezi pritet të rikthehet në Mançester pas pushimeve të cilat janë zgjatur pak më tepër për shkak të pjesëmarrjes së tij në Ligën e Kombeve me Portugalinë. Spanjollja “AS” këmbëngulte se i interesuar për shërbimet e pesë herë fituesit të “Topit të Artë” është edhe Bajerni, që do të donte të transferonte yllin e dytë në Mynih këtë verë pas Manesë. Por një lajm i tillë është hedhur kategorikisht poshtë nga “Sky
Sport Deutschland” dhe “Bild” në Gjermani. Ronaldo nuk hyn aspak në planet e kampionëve të Gjermanisë, të cilët po mundohen ende që të mbajnë Levandovskin në skuadër, pavarësisht këmbënguljes së polakut për t’u larguar drejt Barcelonës. Sipas “Bild”,
CR7, i cili fiton rreth 29 milionë euro neto në Mançester, do të prishte të gjithë ekuilibrin e strukturës së rrogave të Bajernit. Madje, ata nuk do të pranonin të paguanin as një rrogë prej 20 milionë eurosh për një lojtar 37-vjeçar. Lojtari më i paguar në Mynih është Levandovski,
por edhe polaku fiton 24 milionë euro bruto në vit. Ndërkohë që Mane do të paguhet me 14 milionë euro nga kontrata 3-vjeçare që firmosë të mërkurën. “Ronaldo te Bajerni është vetëm një spekulim i çmendur”, shkruante “Bild” një ditë më parë. Pak orë më
vonë, drejtori sportiv, Hasan Salihamixhiç, u shpreh për “Sky”: “Ronaldo është një lojtar i madh, një kampion me një karrierë të jashtëzakonshme. Por dua të qartësoj se një afrim i tij i mundshëm te Bajerni është një spekulim, pa asgjë të vërtetë”.