Hoti shkëlqen sërish, Partizani barazon ndaj gjigantëve të Mariborit
Mbyllet 1-1 ndeshja e fundit miqësore në Slloveni Golat shënohen me “dhurata”, ekipet tregohen bujare
Partizani e ka mbyllur me barazim serinë e miqësoreve në tokën sllovene në kuadër të fazës përgatitore që po zhvillon në këtë vend. Të kuqtë kanë barazuar mbrëmjen e djeshme me shifrat 1-1 ndaj vendësve të Mariborit, që janë një nga ekipet më me histori dhe më të forta në vendin e tyre. Ishte një ndeshje shumë e luftuar, me trajnerin Mehmeti, që nuk bëri shumë zëvendësime dhe i dha ngarkesë maksimale titullarëve. Të parët shënuan të kuqtë në minutën e 34-t me Engjëll Hotin, që vazhdon të shkëlqejë me të kuqtë, teksa Maribori barazoi në minutën e 50-të.
PJESA E PARË – Rasti i parë i ndeshjes erdhi në minutën e 5-të pas një goditjeje me kokë të lojtarëve të Mariborit. Pak sekonda më pas Bitri dhe Rrapaj nuk merren vesh dhe rrezikojnë sërish, por fatmirësisht pa dëme fatale. Pas një çerek ore lojë vendësit rrezikojnë sërish. Fillimisht një goditje nga jashtë zonës bllokohet nga të kuqtë, teksa e njëjta gjë ndodh edhe me një tentativë më pranë portës. Pas 23 minutash vjen rasti i parë i rrezikshëm për Partizanin, me Hadrojn që nga pranë portës, heziton të godasë dhe mbrojtësit e Mariborit e neutralizojnë. Pas pesë minutash, Skuka tenton rrezikshëm kuadratin, por Hoti i pafat e bllokon. Në të 34-ën vjen edhe goli i parë i ndeshjes. Është Hoti, i cili në versionin e qendërsulmuesit tipik, i vjedh topin mbrojtësit të Mariborit dhe godet saktë, duke kaluar Partizanin në avantazh. Në minutat e fundit, Maribori kishte tri raste për gol. Fillimisht një nga sulmuesit sllovenë nuk pati shënjestër përballë Teqjes. Në të 44-ën, lojtarët sllovenë nuk arrijnë të shtyjnë dot topin në rrjetë nga shumë pranë në zhvillimet e një këndoreje, ndërsa në të 45-ën Teqja tregon aftësitë e tij duke devijuar në këndore një goditje të fortë nga jashtë zonës.
PJESA E DYTË – Ky fraksion u karakterizua nga një lojë me ritëm më të ulët, e ndikuar nga lodhja e dy skuadrave, që vijnë të dyja pas pauzës së ndeshjeve zyrtare. Gjithsesi, të dyja skuadrat patën rastet e tyre. Në të 49-ën Hadroj jep një krosim të mirë për Caren, i cili kishte vetëm detyrën ta devijonte në kuadrat, por nuk ia doli. Vetëm një minutë më pas, vjen goli i barazimit nga ana e Mariborit. Rrapaj gabon të zotërojë një top në dalje të zonës dhe kundërshtarët përfitojnë, me
Bërniç, që tund rrjetën e të kuqve dhe shënon golin e tij të dytë në këto ndeshje përgatitore. Pas rrjetës, Maribori merr zemër dhe kërkon fitoren për të gëzuar tifozët e pranishëm në shkallët e stadiumit. Gjithsesi, Teqja tregon edhe një herë se është i gatshëm të luftojë me
Hoxhën e Rexhepin për portën. Gardiani bën një super pritje në minutën e 62-të, teksa tre minuta më pas një përplasje në mesfushë shkakton një sherr masiv mes lojtarëve, që fatmirësisht neutralizohet shpejt. Në minutën e 70-të Teqja kryen një tjetër pritje vendimtare, teksa pas shtatë minutash të njëjtën gjë e bën portieri i sllovenëve pas një goditjeje fluturimthi të Muratajt. Në sekondat e para të shtesës portieri i Partizanit pret në trekëndësh një predhë të lojtarëve të Mariborit dhe ruan shifrat 1-1 të të gjithë ndeshjes.