Çelsi bëhet ultraofensiv me Rafinjën, Silva thërret edhe Nejmarin
Mbyll me Lidsin për 55 milionë paund, sulm edhe për Sterling
Çelsi ka nisur një sulm për të transferuar Rafinjën nga Lidsi, duke ia rrëmbyer sulmuesin brazilian në momentet e fundit Arsenalit. “Topçinjtë” ishin favoritë për të siguruar shërbimet e lojtarit të krahut, por blutë e Londrës kanë kontaktuar menaxherin e futbollistit, ish-mesfushorin e vetë Dekon, ndërkohë që Lidsit i ka bërë një ofertë 55 milionë paund plus 5 milionë bonuset, e cila është pranuar nga klubi. Arsenali kishte negociuar me Lidsin dhe javën e shkuar atyre u ishte refuzuar një ofertë 30 milionë paund plus bonuset. Por gjatë këtyre ditëve ata kishin bërë një ofertë të dytë të përmirësuar, por që nuk i afrohej shifrës së Çelsit, e cila ishte ajo që kërkonte Lidsi dhe tani Rafinja është shumë pranë transferimit në “Stamford Bridge”. Marrëveshja me lojtarin nuk është arritur ende, por ajo nuk pritet të jetë një problem. Tani të gjitha energjitë e pronarit të ri Tod Bohli janë të përqendruara për të arritur marrëveshjen me Mançester Sitin edhe për transferimin e Rahim Sterlingut, për të cilin kampionët e Anglisë kërkojnë një shifër 5055 milionë paund. Sulmuesi 27vjeçar hyn në vitin e fundit të kontratës në “Etihad”, por për shkak të hapësirave të pakta në skuadrën e Guardiolës ai pritet të largohet gjatë kësaj merkatoje. Çelsi po punon për ta mbyllur
marrëveshjen brenda kësaj jave. Dy krahët e rinj të sulmit të Tomas Tuhelit pritet t’i kushtojnë amerikanit 105 milionë paund. NEJMAR – Këto ditë është përfolur edhe një transferim i mundshëm i Nejmarit në “Stamford Bridge”, i cili merr edhe bekimin e shokut të tij të kombëtares braziliane,
Tiago Silva. Qendërmbrojtësi i Çelsit, i pyetur nga qyteti i Resifes, ku ndodhet aktualisht me pushime, tha për mediat braziliane: “Nejmari duhet të shkojë te Çelsi, do të ishte gjëja më e mirë. Ai nuk ka nevojë për mbështetje. Deri tani unë nuk di asgjë, por shpresoj që të vijë”. Presidenti i PSG-SË, Naser Al-khelaifi refuzoi të konfirmonte nëse sulmuesi do të jetë pjesë e planeve të PSG-SË për sezonin e ardhshëm. “O Ney” ka edhe tri vite kontratë në “Parc des Princes” dhe kjo është një tjetër pjesë që e vështirëson situatën. Nëse duhet të vijë te Çelsi, ai duhet të sakrifikojë një pjesë të mirë të rrogës së tij prej 45 milionë eurosh.