Kukësi përmbys Egnatian, vulos blerja e janarit
Kukësi bëri një përmbysje fantastike ndaj Egna tias, duke marrë tri pikë të arta, që pavarësisht se e mbajnë sërish në zonën e ftohtë, i japin një shtysë të madhe për vazhdimësinë në kampionat. Fitorja 1-2 në Rrogozhinë erdhi në momentin më delikat për verilindorët, ndërsa nga ana tjetër, skuadra e Shpëtim Duros pësoi një shok psikologjik. Edhe pse për shumë minuta ishte në avantazh pas golit të Fernandos me penallti, u befasua në fundin e lojës, kur pësoi dy gola të shpejtë. Fillimisht Edison Ndreca barazoi shifrat, i ndihmuar edhe nga një devijim i Malotës, ndërsa mesfushori serb, Mirza Delimedjac, i dha fitoren ekipit të Rrahman Hallaçit në ndeshjen e tij të parë me fanellën e Kukësit. Egnatia e nisi lojën me skemën 3-5-2, teksa Duro i besonte dyshes Daumena-paulauskas në sulm. Kapiteni Xhekson qëndroi një stol gjatë gjithë ndeshjes, për shkak se kishte marrë një dëmtim në stërvitje. Hallaçit i përgjigjej Duros me një mbrojtje me tre, ku si titullar ishte për herë të parë Lamçe, ndërsa në qendër të mesfushës risia krah vëllezërve Taipi ishte nigeriani Momoh.
GOLAT - Në pjesë e parë pati tri momente pikante, ku fillimisht një goditje e rrufeshme e Donald Mëllugjës nga afërsia e zonës, krijoi idenë e supergolit, por topi kaloi ngjitur me shtyllën. Më pas Kukësi reagoi pas një kundërsulmi me protagonist Shqiprim Taipin dhe brazilianin Gabriel Barbosa. Ky i fundit mposhti Sherrin, por jo Atandën, i cili bëri portierin, duke larguar me kokë një top që po shkonte në rrjetë. Në momentin më të ekuilibruar të ndeshjes, mbrojtësi i Kukësit, Ebert, gabon fatalisht, teksa shkakton një penallti naive pas ndërhyrjes ndaj Duamenës. Nga pika e bardhë shënoi Fernando dhe rrogozhinasit u dukën se kishin gjithçka në dorën e tyre, por Kukësi nuk u dorëzua. Në pjesën e dytë verilindorët insistuan për të shkuar te goli, duke bazuar lojën te Ndreca në të majtë dhe Basha në të djathtë. Goli i barazimit nuk vonoi me Ndrecën dhe këtu ishte pika e kthesës për kuksianët, ndërsa Hallaçi aktivizoi Delimedjac dhe Berishën. Kjo dyshe i dha fitoren miqve, ku pas kombinimit mes tyre, mesfushori serb lëshoi një të djathtë të hidhur. Gjashtë minutat shtesë nuk sollën ndryshime, pavarësisht presionit të Egnatias.