Paralajmëron Idrizi: Kjo është kambana e fundit
Në Vlorë nuk kapërdi het aspak humbja me Apoloninë. Sinan Idrizi shpërthen ndaj lojtarëve dhe stafit teknik, që sipas tij nuk e kanë kuptuar se çfarë është Flamurtari. Gjatë një prononcimi ekskluziv për "Panorama Sport", administratori Idrizi e cilëson pikën më kritike, humbjen në Fier. Pas këtij momenti, thotë se fjalët i kanë mbaruar, ndërsa nuk po e kupton se çfarë po ndodh realisht. Administratori thotë, se në futboll ka luhatje, por jo në këtë farë feje. "Ore, e kuptojnë apo jo këta... Këtu jemi në momentin kur fjalët nuk kanë më vend. Ka dy gjëra këtu... Ose unë nuk u kam shpjeguar këtyre se çfarë është Flamurtari ose këta nuk e kanë kuptuar se çfarë është Flamurtari. Unë jam në teatër tani se po përgatitemi për koncertin e ditës së nesërme (sotme) të grupit të mirënjohur italian "Richi e Poveri", që i kam ftuar për qytetin, pasi duam ta bëjmë sa më dinamike jetën artistike dhe sportive të Vlorës dhe po më thotë Sokol Toto (drejtori i Teatrit të Vlorës), që do të marrim ne këtej se ata qafirët nuk ta dinë vlerën... Ti punon, hedh lekë, bën investim dhe... Ore unë nuk e di çfarë nuk shkon me këta djem. Në rregull, jam shumë i ndërgje-gjshëm që në futboll ka luhatje, ka kurbatura. Por duket se jemi në pikën më të keqe", shprehet fillimisht Idrizi.
ULTIMATUMI I FUNDIT
Nëse përsëritet qoftë edhe një herë të vetme, Sinan Idrizi thotë se nuk do të ketë më asnjë tolerim. Humbjen në Fier e shikon si kambanën e fundit. Mërzitja e Idrizit është aq e madhe, saqë nuk ka preferuar fare të takojë skuadrën pas asaj që ndodhi. E thotë hapur, se i kanë shëmtuar ditën dhe nuk do të tolerojë më. Ndërsa nuk do ta besojë se në Vlorë mund të kenë ardhur për të kaluar ditën. Kreu i klubit e ka të qartë ultimatumin kur thotë se pas kësaj, të gjithë duhet t'i bëjnë mirë llogaritë. "Ju them që një orë e më parë të kthehen ku duhet. Nuk kam pse t'i takoj. Nuk jam propagandues. Sa u përket masave, unë nuk jam kazermë ushtarake të ndëshkoj njerëz. Unë nuk e kuptoj këtë situatë, është e vështirë të kuptohet. Na kanë shëmtuar ditën. Të ndryshojnë sa më parë nëse janë të përgjegjshëm. Ah, nëse kanë ardhur të kalojnë ditën në Vlorë dhe te Flamurtari, kjo është gjë tjetër. I paralajmëroj të gjithë se kjo është kambana e fundit. Nuk ka më pas kësaj, t'i bëjnë mirë llogaritë!", thotë administratori.
OBJEKTIVI DHE MERKATOJA
Sinan Idrizi nuk ndalet. Kreu i klubit përsërit objektivin. "Kërkoj jo vetëm respektin ndaj fanellës, por edhe vendin e parë në klasifikim. Ju e patë që unë i dyti nuk dal dot, por i fundit kam dalë. I dyti dhe i fundit për mua është njësoj, tani dua të dal i pari", shprehet Idrizi. Një koment e ka edhe për merkaton, si dhe kuzhinën. "Më thonë ekspertët, se ata që kemi marrë janë superlojtarë. Unë e kam thënë gjithmonë që nuk e di se çfarë ka bërë kuzhina, dua të shikoj gjellën. Pa e shijuar nuk flas dot... Por kjo gjella e parë ishte pa shije. Nuk pranoj të zhgënjehemi me gjellët e tjera", përfundon Idrizi.