Goditje në minutat finale, “demat” marrin Selmanin

Tetovari shkëlqeu vjet me fanellën e Renovës

Me largimin e Xhu liano Skukës te Metzi në Francë vetëm 8 ditë nga mbyllja e merkatos, Partizani u vu shpejt në lëvizje për të plotësuar në kohë rekord sulmin e skuadrës, në mënyrë që të jenë në gjendje të vazhdojnë luftën për titullin kampion. Ditën e djeshme të kuqtë kanë qenë në negociata deri në orët e fundit dhe kanë arritur të finalizojnë marrëveshjen me Remzifaik Selmanin, një nga sulmuesit më të mirë në Maqedoninë e Veriut në sezonin e kaluar. “Panorama Sport” mëson ekskluzivisht se vetëm pak minuta para se të mbyllej sistemi i FIFA-S, “demat” kanë arritur të federojnë 25-vjeçarin, i cili vjen si lojtar i lirë. Tetovari në sezonin e kaluar shënoi plot 15 gola në kampionatin maqedonas me fanellën e Renovës. Kjo ishte edhe statistika më e mirë në karrierën e tij si profesionist. Në verë ai u transferua në Hungari te klubi i Mezokovezd. Por aventura hungareze nuk shkoi siç pritej. Ai nuk shënoi asnjë gol dhe u aktivizua shumë pak, çka solli edhe divorcin mes palëve. Me ardhjen te Partizani, Selmani

bëhet menjëherë në një kandidaturë kryesore për ofensivën, teksa bonusi i tij është fakti se mund të luajë në të tria pozicionet e sulmit. 25vjeçari me shumë mundësi do të jetë partner me Mbanë dhe Carën në sulm, megjithëse trajneri Kolela bën shpesh ndryshime në formacion dhe nuk jep idenë e një rreshtimi fiks. Tetovari njihet për gjakftohtësinë e tij në finalizim, teksa do t’i shtojë mjaft shpejtësi ofensivës së të kuqve. Në orët në vijim Partizani pritet të zyrtarizojë marrëveshjen me Selmanin, teksa pas ndeshjes së sotme ai pritet të nisë stërvitjen me klubin e kuq, për të arritur të jetë gati për ndeshjen e së hënës ndaj Laçit, shumë e rëndësishme për shkak të situatës ku ndodhen “demat”. Selmani ka arritur të shënojë 42 gola dhe ka dhuruar 20 asiste në karrierën e tij si profesionist.