Merkato, Vllaznia iu fal Balajt
Rikthimi i sulmuesit shkodran pas 13 vitesh, afrimi i vetëm i klubit në janar Vijon “lufta e ftohtë” me Ante Aralicën, por as çështja e Kristjan Vulajt nuk po zgjidhet
Vllaznia ka mbyllur merkaton e dimrit vetëm me një afrim, atë të sulmuesit Bekim Balaj, i cili u rikthye në Shkodër pas 12 vitesh e shtatë muajsh karrierë jashtë Shqipërisë. Një afrim i bujshëm, jo vetëm nga emri i lojtarit, por edhe nga kontrata që do të përfitojë shkodrani në tri vite, duke e bërë atë më të paguarin e kampionatit shqiptar (12 mijë euro në muaj). Mirëpo, drejtuesit që bënë një afrim të tillë, duket se kishin planifikuar edhe të tjera lëvizje, pikërisht atë të prishjes së kontratës me sulmuesin kroat, Ante Aralica, por edhe një zgjidhjeje të çështjes së fantazistit
Kristjan Vulaj, për të cilin opsioni i huazimit ishte në lojë. Shpenzimet për këta lojtarë do të bënin të mundur edhe zbutjen e shumës që do të paguhej për Balën. Megjithatë, në mbyllje të merkatos drejtuesit e klubit nuk kanë gjetur
gjuhën e përbashkët me Aralicën dhe Vulajn. “Panorama Sport” mëson se dy lojtarët nuk kanë pranuar zgjidhjen e kontratës me një marrëveshje që klubi iu ka ofruar për dëmshpërblimin. Për këtë arsye do të vijojnë që të jenë pjesë e ekipit, por ama me ndryshimin që Aralica prej javësh nuk grumbullohet nga Josa, ndërsa Vulaj vijon të jetë në stol pa marrë asnjë minutë. Mësohet se lojtarët do të vijojnë stërvitjet me skuadrën dhe do të marrin pagat e nënshkruara në kontratë deri në fund të sezonit. Nëse kroatit i skadon marrëveshja në muajin maj, e kundërta ndodh me Vulajn, i cili ka kontratë edhe për dy vite të tjera. Dy lojtarët mësohet se paguhen nga 6 dhe 5 mijë euro në muaj, duke kapur rrogën e Balajt, prandaj largimi i tyre do të ulë kostot, për më tepër që trajneri nuk i ka në plane për pjesën e mbetur.
GOLAT
Fjoart Jonuzi është lojtari i momentit te Vllaznia. Katër gola në pesë ndeshjet e fundit e kanë kthyer atë në bomber. Mesfushori kuksian e nisi vitin 2023 aty ku e la 2022shin. Shënoj në takimin përmbyllës ndaj Teutës në Shkodër dhe e vijoj me katër gola në këtë vit. Ai arriti t’i shënoj Partizanit, duke i hapur rrugë fitores 1-2 të Vllaznisë në transfertë. Më pas i shënoj Bylisit në Kupë, për të vijuar në kampionat ndaj Laçit. Nuk arriti të shënojë në ndeshjen e kampionatit në Ballsh, ku Vllaznia humbi 0-1, por gjeti sërish golin ndaj Erzenit, pavarësisht se këtë herë shkodranët pësuan disfatë në shifrat 3-2. Jonuzi është në kuotën e katër golave në kampionat, duke barazuar një tjetër mesfushor, Herald Markun. Tashmë kuksiani është vetëm një gol larg golashënuesit më të mirë të Vllaznisë deri në këto momente, Ardit Hoxhaj. Kuqeblutë luajnë nesër ndaj Bylisit ndeshjen e kthimit për Kupë, ku do të kërkojnë të menaxhojnë më së miri fitoren 0-2 në Ballsh.