Zgjohet Bajerni, Nagelsman: Presioni dha efekt
Sulmi fillon të funksionojë sërish në mënyrë perfekte
“Ditët me acar” në këtë dimër duket se i kanë lënë vend sërish diellit në kampin e Bajern Mynihut mbi bazë të rezultateve. Të besuarit e Julian Nagelsmanit arritën të bënin autokritikë në Kupë përballë Maincit në versionin më të mirë, e përkthyer me “poker” golash.
NDESHJA- Nagelsman do të vinte me skemë tërësisht sulmuese, aty ku 6 lojtarë të ndryshëm me tipare sulmuese do të merrnin nuance ofensive. 17 minuta do t’i mjaftonin Erik Maksim Çupo-moting për të dërguar topin në kudrat pas pasimit të Kanseloz. Afrimi i ri nga Siti do ta niste me këmbën e mbarë këtë aventure të re në karrierën e tij. Vazhdimi i takimit do të mbante të njëjtën ritëm intensiteti nga miqtë e Mynihut, e ku do të shpërbleheshin në minutën e 30’-të me dyfishimin e rezultatit. Musiala do të zhbllokohej më në fund dhe do të godiste saktësisht në katërkëndësh. Fryma e fundit e fraksionit nga pjesa e parë do të dhuronte edhe një tjetër konkretizim për Bajernin me autor Sanenë. Tabloja e së dytës do të shfaqte më tepër qetësi, aty ku bavarezët e interpretonin ritmin e lojës sipas dëshirës së tyre. Alfonso Dejvis do t’i vinte vulën rezultatit final dhe mbylljen e dilemave rreth gjendjes së kampionëve në fuqi të Bundesligës në minutën e 84’-t.
NAGELSMAN-”MEDIA ka luajtur rol negativ në gjendjen tonë psikologjike ditën e fundit dhe jam i sigurt se nëse nuk do të kishin kaq pushtet dhe ndikim, bota do të ishte shumë më e pastër. Gjithsesi ky aspekt është i pashmangshëm. Më në fund arritën të dëfreheshim në mënyrën më të mirë në fushën e blertë, në
periudhë jo fortë të përshtatshme në kampin tonë. Besoj se presioni e kreu punën e vet dhe në këtë rast na shërbeu për mirë. Suksesi te Bajerni shikohet gjithmonë si pjesë e menysë së zakonshme dhe kjo nuk do shumë mend për t’u kuptuar. Reagimi në këtë pikë na dha shtysë të jepnim
më të mirë, e përkthyer me 4 gola në kudrat. Sulmi prezantoi anën më të mirë, edhe pse para disa ditësh u përpoqën nga shtypi të viheshin me shpatulla pas murit. Musiala, Sane dhe Çupo-moting ishin në ditën e tyre, ndonëse jo në versionin më të mirë, pasi ata e kanë dëshmuar se deri në çfarë pikë mund të shkojnë. Tashmë është koha të mbledhim veten pas ujërave të trazuara më tepër nga mediat, sesa interpretimi ynë në lojë. Tituj pozitiv do të dalin sërish dhe ne do të lavdërohemi, kjo është media dhe pasojat e saj”, përfundoi 35-vjeçari.